IIV Akademiyasida “Huquqni muhofaza qilish faoliyatida sunʼiy intellekt: zamonaviy kibertahdidlar va raqamli kriminalistikaning dolzarb masalalari” mavzusida ilmiy-amaliy konferensiya boʻlib oʻtdi
2026-04-28 10:00:00 / Yangiliklar
Gibrid formatda oʻtgan xalqaro anjumanda manfaatdor vazirlik va tashkilotlar vakillari, soha mutaxassislari, mamlakatimiz va xorijiy davlatlarning yetakchi oliy taʼlim va ilmiy-tadqiqot muassasalaridan olimlar hamda kursantlar ishtirok etdi.
Konferensiya avvalida huquqni muhofaza qiluvchi organlar faoliyatiga sunʼiy intellekt texnologiyalarini keng joriy qilish, kiberjinoyatlarga qarshi kurashish samaradorligini oshirish, raqamli kriminalistika imkoniyatlarini kengaytirish, bu borada ilgʻor tajribalarni oʻrganib, amaliyotga tatbiq etish tadbirdan koʻzlangan asosiy maqsad ekanligi aytib oʻtildi.
Anjumanda Xitoy Jamoat xavfsizligi universiteti, Qirgʻiziston IIV akademiyasi, Rossiya IIV Sibir yuridik instituti, Toshkent kimyo xalqaro universiteti, Huquqni muhofaza qilish akademiyasi, Raqamli texnologiyalar va sunʼiy intellektni rivojlantirish ilmiy-tadqiqot instituti hamda IIV akademiyasi vakillari soʻzga chiqdi.
“Dipfeyk” jinoyatlari va ularning oldini olish», “Raqamli chegarani himoya qilish: sunʼiy intellekt davrida kiberxavfsizlik”, “Sunʼiy intellektdan foydalangan holda sodir etilayotgan kiberjinoyatlarga qarshi kurashish”, “Raqamli kriminalistika ilmiy-tadqiqot institutining ilmiy tadqiqot natijalarini jinoyatlarni fosh etish va tergov qilishda qoʻllash”, “Huquqni muhofaza qilish sohasida raqamli texnologiyalar va sunʼiy intellektning amaliy tatbiqlari” va boshqa mavzuda maʼruzalar tinglandi.
Huquqni qoʻllash amaliyotida sunʼiy intellekt texnologiyalaridan foydalanish boʻyicha milliy huquqiy bazani takomillashtirish, kiberjinoyatlarni aniqlash va fosh etishning zamonaviy texnik vositalari hamda algoritmlarini yaratish, raqamli kriminalistika boʻyicha mutaxassis kadrlarni tayyorlash sifatini oshirish, axborot texnologiyalari sohasidagi jinoyatlarga qarshi kurashishni ilmiy jihatdan taʼminlash kabi yoʻnalishlarda dolzarb taklif va tavsiyalar ishlab chiqildi.
IIV Akademiyasi Axborot xizmati