Ichki ishlar vazirligi rahbariyati ishtirokida Navoiy viloyati IIBda tanqidiy-tahliliy yigʻilish oʻtkazildi
2026-04-26 14:50:00 / Yangiliklar
Oʻzbekiston Respublikasi Ichki ishlar vaziri oʻrinbosari, polkovnik Diyorbek Nematjonovich Sattarov hamda polkovnik, Rustam Ravshanovich Mirzayevlar tomonidan Navoiy viloyatida jamoat xavfsizligini taʼminlash hamda jinoyat va huquqbuzarliklarning barvaqt oldini olish borasida amalga oshirilayotgan ishlarni koʻzdan kechirish maqsadida oʻrganishlar olib borildi.
Oʻrganishlar davomida Nurota tumanidagi bir nechta mahalla va obyektlar koʻzdan kechirildi. Dastlab, tuman IIB binosi, xodimlar uchun yaratilgan shart-sharoitlar oʻrganilib, amalga oshirilayotgan ishlar bilan tanishildi. Shundan soʻng, tumanning “Mustaqillik“ mahallasidagi oʻrganishlar davom ettirilib, jinoyatchilikni jilovlash va huquqbuzarliklarni erta aniqlash, “Chilonzor tajribasi”ni keng joriy etish boʻyicha koʻrilgan chora-tadbirlar bilan tanishildi.
Mazkur hududda istiqomat qiluvchi aholini qiynab kelayotgan muammolarni oʻz oʻrnida va sifatli hal etish, ishsiz aholi bandligini taʼminlash va kriminogen vaziyatni barqarorlashtirish boʻyicha masʼullarga aniq topshiriq va tavsiyalar berildi.
Viloyat ichki ishlar boshqarmasida oʻtkazilgan yigʻilishda joriy yilning 3 oyi mobaynida viloyat hududida huquqbuzarlik va jinoyatchilikning barvaqt oldini olish borasida amalga oshirilgan ishlar, ichki ishlar boʻlimlari va sohaviy xizmatlar faoliyati tahlil qilindi. Shuningdek, chorak davomida kriminogen vaziyatni yanada yaxshilash, jinoyat va huquqbuzarliklarga qarshi kurashish, jamoat tartibini saqlash, yoʻl-harakati xavfsizligini taʼminlash hamda mahallalarda xavfsiz muhitni yaratish borasida amalga oshirilgan ishlar, erishilgan yutuqlar, yoʻl qoʻyilgan kamchiliklarga alohida toʻxtalib oʻtildi.
Xizmat intizomi va qonunchilikni mustahkamlash, xodimlarni har tomonlama qoʻllab-quvvatlash, ular tomonidan turli koʻrinishdagi salbiy holatlar sodir etilishini oldini olish mavzulari yuqori koʻtarildi. Bundan tashqari, ichki ishlar organlarini xalqchil va professional tuzilmaga aylantirish borasida ijobiy ishlarni yanada jadallashtirish, xodimlarni jangovar va jismoniy shayligini, bilim darajalarini oshirish maqsadida qator chora-tadbirlar belgilab olindi.
Navoiy viloyati IIB axborot xizmati