IIV rahbariyati tomonidan Buxoro viloyatida mahalla kesimida kriminogen vaziyat oʻrganilib, ichki ishlar organlarining 3 oylik faoliyati sarhisob qilindi
2026-04-25 20:45:00 / Yangiliklar
Joriy yilning 24-aprel kuni IIV rahbariyati tomonidan Buxoro shahridagi “Shayx-ul Olam” mahallasida jinoyatchilikni jilovlash, kriminogen vaziyatni barqarorlashtirish hamda xavfsiz muhitni yaratish maqsadida amaliy oʻrganishlar oʻtkazildi. Jarayonda “Chilonzor tajribasi” asosida hududni kichik sektorlarga boʻlish, har bir xonadon bilan individual ishlash va manzilli profilaktik tadbirlarni tashkil etish masalalari tahlil qilindi.
Shundan soʻng Buxoro viloyati Ichki ishlar boshqarmasida yilning birinchi choragi yakunlariga bagʻishlangan kengaytirilgan, tanqidiy-tahliliy yigʻilish boʻlib oʻtdi. Yigʻilish IIV vaziri oʻrinbosarlari – polkovniklar Diyorbek Sattarov va Rustam Mirzayev raisligida oʻtkazilib, unda viloyat IIB rahbariyati, sohaviy xizmatlar hamda hududiy ichki ishlar organlari rahbarlari ishtirok etdi.
Yigʻilishda hududdagi kriminogen vaziyat, jinoyatchilikka qarshi kurashish va huquqbuzarliklarning oldini olish borasidagi ishlar tanqidiy ruhda tahlil qilindi. Masʼul rahbarlarning hisobotlari tinglanib, mavjud kamchiliklar ochiq muhokama qilindi. Jinoyatlarning sabablarini aniqlash va bartaraf etish, profilaktika samaradorligini oshirish hamda hududlarda barqaror vaziyatni taʼminlash boʻyicha aniq vazifalar belgilandi.
Shuningdek, Oʻzbekiston Respublikasi Prezidentining 1-sonli (PQ-1) qarorlari hamda boshqa normativ-huquqiy hujjatlar ijrosi koʻrib chiqilib, ularning joylarda samarali bajarilishini taʼminlash yuzasidan topshiriqlar berildi.
Xizmat intizomi va qonuniylikni mustahkamlash masalasiga alohida eʼtibor qaratilib, kamchiliklarga nisbatan murosasiz yondashuv zarurligi taʼkidlandi. Shu bilan birga, xizmat faoliyati davomida jiddiy kamchiliklarga yoʻl qoʻygan 17 nafar rahbarning kelgusidagi xizmat faoliyatini qayta koʻrib chiqish maqsadida xizmat tekshiruvi tayinlangani maʼlum qilindi. Chorak yakunlari boʻyicha xizmatda yuqori natijalarga erishib, hamkasblariga namuna boʻlayotgan bir guruh xodimlar ragʻbatlantirildi.
Yigʻilish yakunida ustuvor vazifalar belgilanib, kelgusida xizmat faoliyati samaradorligini yanada yaxshilash boʻyicha masʼullarga aniq topshiriqlar berildi.