O‘zbеkiston Rеspublikаsi Ichki ishlаr vаzirligi

Davlatimiz rahbarining Mirzo Ulugʻbek tumaniga tashrif buyurib, tuman hokimligi faoliyati, joylardagi bunyodkorlik va infratuzilmani rivojlantirish ishlari bilan yaqindan tanishdi.

Hududda aholi farovonligini yanada oshirish, muammolarni tezkor aniqlash va hal etish boʻyicha “Aqlli tuman” platformasi ishga tushirilishi, tumandagi barcha mahalla vakillari bilan onlayn muloqot qilish, vaziyatdan doimo xabardor boʻlish imkoniyati yaratilganligi ijobiy baholanib, Toshkent shahrining barcha tumanlarida ushbu namunali tajribani joriy etish boʻyicha topshiriqlar berildi.

Mazkur vazifalardan kelib chiqib, joriy yilning 25-aprel kuni Chilonzor tumani hokimligida Ichki ishlar vaziri general-leytenant Aziz Tashpoʻlatov raisligida, vazirlik sohaviy xizmatlari rahbarlari, tuman hokimligi mutasaddilari, huquqni muhofaza qilish organlari hamda 55 ta mahalla raislari va mahallalarga biriktirilgan masʼullar ishtirokida hisobot yigʻilishi oʻtkazildi.

Tadbirda Mirzo Ulugʻbek tumani tajribasi boʻyicha sunʼiy intellekt asosidagi “Xavfsiz va raqamli tuman” tizimini joriy etish, “Xalq nazorati” platformasiga kelib tushayotgan murojaatlarni oʻz vaqtida hal etish, amaliyotda qoʻllanilayotgan tarqoq maʼlumotlar almashinuvini umumlashtirish masalalari muhokama qilindi.

Chilonzor tumanining har bir mahallasidagi kriminogen vaziyat, yurtdoshlarimizning muammolarini oʻrganish va hal etish darajasi, taʼlim muassasalarida xavfsizlikni taʼminlash, bozorlar, koʻngilochar maskanlarda jamoat xavfsizligi bilan bogʻliq har qanday muammoni oʻz vaqtida bartaraf etish borasida masʼullarga topshiriqlar berildi.

Shuningdek, jinoyatchilik va huquqbuzarliklarni oldini olishda aholi bandligini taʼminlash, yoshlar va ayollar masalalariga jiddiy eʼtibor qaratish, nizoli oilalar bilan manzilli ishlash ayni vaqtdagi dolzarb masalalar ekanligi taʼkidlandi.

Tanqidiy ruhda oʻtgan yigʻilishda aholi murojaatlarni qabul qilish va oʻrganishda bir qator kamchiliklarga yoʻl qoʻyilayotganligi aytib oʻtildi. Tahlillarga koʻra, murojaatlarning aksariyati obodonlashtirish, ekologiya, boshqaruv servis kompaniyalari faoliyati boʻyicha kelib tushayotgan boʻlib, har bir hal etilgan murojaat bir mahalla, bir oila, bir fuqaroning taqdiri va turmushida katta ijobiy oʻzgarishlarni olib kelishi tushuntirildi.

Yigʻilish yakunida tuman hokimi hamda boshqa masʼullarning fikrlari tinglanib, mavjud kamchiliklarni tez fursatda bartaraf etish va kelgusi faoliyat davomida davlat rahbari tomonidan berilgan topshiriqlar ijrosi boʻyicha zaruriy rejalar belgilab olindi.

Tadbir davomida, Ichki ishlar vaziri boshchiligidagi ishchi guruh tomonidan Chilonzor tumanida amalga oshirilayotgan ijtimoiy va infratuzilmaviy ishlar oʻrganildi. Xususan, “Beshchinor” mahallasi fuqarolar yigʻini binosi va atrofdagi infratuzilma, Bunyodkor koʻchasida olib borilayotgan taʼmirlash va obodonlashtirish ishlarining sifati, aholi uchun yaratilayotgan qulayliklar koʻzdan kechirildi.

Shuningdek, “Botirma” mahallasida tashkil etilgan 24/7 sayilgoh faoliyati, uning aholi dam olishi uchun yaratilgan shart-sharoitlari hamda xavfsizlik choralari atroflicha tahlil qilindi. Ishchi guruh tomonidan jamoat tartibini taʼminlash va fuqarolar xavfsizligini mustahkamlashga qaratilgan vazifalar belgilab berildi.

Bundan tashqari, xalqaro Buchyon universitetida talabalar uchun yaratilgan sharoitlar, taʼlim muhiti va xavfsizlik masalalari oʻrganilib, mavjud imkoniyatlarni yanada takomillashtirish boʻyicha tegishli tavsiyalar berildi.

Oʻrganish ishlari boshqa tumanlarda ham davom etmoqda.