Xalq deputatlari Andijon viloyati kengashining navbatdagi sessiyasida Andijon viloyati IIB boshligʻining hisoboti tinglandi
2026-04-25 10:10:00 / Yangiliklar
Xalq deputatlari Andijon viloyati kengashining navbatdagi sessiyasida Andijon viloyati IIB boshligʻining kriminogen vaziyatni yaxshilash, jinoyatlarni barvaqt oldini olish hamda jamoat xavfsizligini taʼminlash borasida amalga oshirilgan ishlar boʻyicha hisoboti tinglandi.
Joriy yilning 24-aprel kuni Andijon viloyati hokimligida Xalq deputatlari Andijon viloyati Kengashining oʻn toʻqqizinchi sessiyasi boʻlib oʻtdi. Sessiyada viloyatdan saylangan Oliy Majlis Senati aʼzolari, viloyat Kengashi deputatlari, boshqarma va idoralar rahbarlari, davlat hamda jamoat tashkilotlari vakillari ishtirok etdi.
Kun tartibiga muvofiq, 2026-yilning oʻtgan 3 oyi davomida viloyatda kriminogen vaziyatni yaxshilash, jinoyatlarni barvaqt oldini olish hamda jamoat xavfsizligini taʼminlash borasida amalga oshirilgan ishlar toʻgʻrisida Andijon viloyati ichki ishlar boshqarmasi boshligʻi, polkovnik Sanjar Djabarovning hisoboti tinglandi.
Hisobotda Oʻzbekiston Respublikasi Prezidentining joriy yilning 5-yanvar kuni qabul qilingan “Respublika mahallalarida xavfsiz muhitni yaratish yoʻnalishida yaxlit manzilli ishlash tizimini joriy etishga qaratilgan qoʻshimcha chora-tadbirlar toʻgʻrisida”gi PQ–1-son hamda “2026-yilda respublika mahallalarida jinoyatchilikning barvaqt profilaktikasi samaradorligini yanada oshirish boʻyicha tashkiliy chora-tadbirlar toʻgʻrisida”gi PQ–2-son Qarorlari ijrosi yuzasidan amalga oshirilgan ishlar hamda erishilgan natijalar haqida atroflicha maʼlumot berildi.
Shuningdek, huquqbuzarliklarning oldini olish, aholi bilan manzilli ishlash, profilaktik chora-tadbirlar samaradorligini oshirishga qaratilgan amaliy ishlar natijalariga alohida eʼtibor qaratildi.
Muhokamalar jarayonida deputatlar tomonidan berilgan savollarga viloyat IIB rahbariyati tomonidan asosli va atroflicha javoblar qaytarildi.
Sessiya yakunida mazkur yoʻnalishdagi ishlarni yanada kuchaytirish, jamoat xavfsizligini taʼminlash hamda jinoyatchilikka qarshi kurashish boʻyicha belgilangan vazifalar ijrosini samarali tashkil etish zarurligi taʼkidlandi.
Andijon viloyati IIB Axborot xizmati