IIV huzuridagi Migratsiya va personallashtirish departamenti rahbariyati tomonidan Xorazmda migratsiya va personallashtirish sohasida manzilli oʻrganishlar olib borildi
2026-04-24 09:00:00 / Yangiliklar
Oʻzbekiston Respublikasi IIV huzuridagi Migratsiya va personallashtirish departamenti boshligʻining birinchi oʻrinbosari, polkovnik Ulugʻbek Mirzaqambarovning Xorazm viloyatiga amalga oshirgan xizmat safari doirasida migratsiya va personallashtirish sohasidagi ishlar holati chuqur oʻrganildi.
Xizmat safari avvalo Xorazm viloyati IIB huzuridagi Migratsiya va personallashtirish boshqarmasidagi shaxsiy tarkib bilan uchrashuvdan boshlandi. Uchrashuv davomida polkovnik U.Mirzaqambarov tizimda amalga oshirilayotgan islohotlar, ayniqsa, sohani raqamlashtirish, aholiga qulaylik yaratish va xizmatlar sifatini oshirish borasidagi ustuvor vazifalarga alohida toʻxtalib oʻtdi.
Jumladan, Oʻzbekiston Respublikasi Prezidentining 2026-yil 19-yanvardagi “Ichki ishlar organlarining migratsiya va personallashtirish sohasidagi faoliyatini raqamlashtirish orqali sifat jihatidan yangi bosqichga koʻtarish chora-tadbirlari toʻgʻrisida”gi PQ-14-son qarori ijrosi doirasida amalga oshirilayotgan ishlar yuzasidan batafsil tushuntirishlar berildi.
Unda, ayniqsa, elektron xizmatlar koʻlamini kengaytirish, inson omilini qisqartirish, fuqarolar uchun ortiqcha sarsongarchiliklarni bartaraf etish hamda shaffoflikni taʼminlashga qaratilgan chora-tadbirlar muhim ahamiyat kasb etayotgani taʼkidlandi.
Shundan soʻng, polkovnik U.Mirzaqambarov viloyatdagi bir qator shahar va tumanlar Ichki ishlar boʻlimlari huzuridagi Migratsiya va personallashtirish boʻlinmalari faoliyatini joyiga chiqqan holda oʻrgandi. Har bir boʻlinmada yaratilgan shart-sharoitlar, xodimlar uchun xizmat xonalarining jihozlanishi, zamonaviy axborot-kommunikatsiya texnologiyalari bilan taʼminlanganlik darajasi koʻzdan kechirildi.
Joylarda oʻtkazilgan uchrashuvlarda sohadagi muammolarni aniqlash, ularni manzilli hal etish, xodimlarni qiynayotgan masalalarni bartaraf qilishga alohida eʼtibor qaratildi. Xodimlar bilan ochiq muloqot oʻtkazilib, ularning fikr-mulohazalari va takliflari tinglandi, amaliy yordam koʻrsatish boʻyicha tegishli koʻrsatmalar berildi.
Xorazm viloyati IIB Axborot xizmati