Andijon viloyati IIB tashabbusi bilan taʼlim muassasalari xavfsizligini taʼminlashga qaratilgan “Xavfsiz bilim maskani” mavzusida keng qamrovli oʻquv-seminari tashkil etildi
2026-04-24 09:00:00 / Yangiliklar
Bugungi kunda jahon miqyosida taʼlim muassasalari xavfsizligini taʼminlash masalasi eng dolzarb vazifalardan biriga aylanmoqda. Turli xavf-xatarlar, favqulodda vaziyatlar va jamoat xavfsizligi bilan bogʻliq tahdidlar taʼlim muassasalarida profilaktik choralarni yanada kuchaytirishni talab etmoqda.
Shu bois, mamlakatimizda yosh avlodning xavfsiz muhitda taʼlim olishi uchun barcha zarur shart-sharoitlarni yaratish davlat siyosati darajasidagi ustuvor vazifalardan biri sifatida belgilangan.
Ana shu maqsaddan kelib chiqqan holda, Andijon viloyatida “Xavfsiz bilim maskani” mavzusida oʻquv-amaliy seminar tashkil etildi.
Unda Andijon viloyati IIB rahbariyati, taʼlim muassasalari rahbarlari, maktab direktorlari, qoʻriqlash xizmati xodimlari hamda xavfsizlik uchun masʼul mutasaddilar ishtirok etdilar.
Seminar davomida taʼlim muassasalarida xavfsiz muhitni shakllantirish, oʻquvchilar va pedagog xodimlarning hayoti hamda sogʻligʻini ishonchli muhofaza qilish, mavjud xavflarni barvaqt aniqlash va ularning oldini olishga qaratilgan dolzarb masalalar muhokama qilindi.
Xususan, maktablarda kirish-chiqish nazoratini yanada kuchaytirish, zamonaviy videokuzatuv va signalizatsiya tizimlarini joriy etish, qoʻriqlash xizmati faoliyati samaradorligini oshirish, shuningdek favqulodda vaziyatlarda tezkor va muvofiqlashtirilgan harakat qilish mexanizmlarini ishlab chiqish yuzasidan aniq taklif va tavsiyalar bildirildi.
Taʼkidlanganidek, taʼlim muassasalari xavfsizligi — bu faqatgina qoʻriqlash masalasi emas, balki oʻquvchilarning ertangi kelajagi, ularning xotirjam taʼlim olishi va ota-onalar ishonchini taʼminlash bilan bevosita bogʻliq muhim vazifadir.
Seminar doirasida taʼlim muassasalarida faoliyat olib borayotgan qorovullar uchun tashkil etilgan maxsus oʻquv kurslari haqida ham atroflicha maʼlumot berildi. Mazkur kurslarda ichki ishlar organlari, favqulodda vaziyatlar xizmati, sogʻliqni saqlash va taʼlim sohasi mutaxassislari hamkorligida nazariy va amaliy mashgʻulotlar oʻtkazilmoqda.
Amaliy mashgʻulotlar jarayonida shartli favqulodda holatlar modellashtirilib, ishtirokchilarning ekstremal vaziyatlarda toʻgʻri qaror qabul qilish, birinchi tibbiy yordam koʻrsatish, evakuatsiya jarayonlarini tashkil etish, shuningdek maktab hududida jamoat tartibi va yoʻl harakati xavfsizligini taʼminlash borasidagi koʻnikmalari sinovdan oʻtkazildi.
Tadbir yakunida masʼullarga taʼlim muassasalarida xavfsizlik tizimini yanada mustahkamlash, profilaktik ishlar samaradorligini oshirish hamda har qanday xavf va tahdidlarning oldini olish boʻyicha tegishli vazifalar belgilab berildi.
“Xavfsiz bilim maskani” oʻquv-amaliy seminari yosh avlodning xavfsiz va osoyishta muhitda taʼlim olishini taʼminlash, taʼlim muassasalarida zamonaviy xavfsizlik tizimini shakllantirish hamda jamoat xavfsizligini mustahkamlash yoʻlidagi muhim amaliy qadamlardan biri boʻldi.
Andijon viloyati IIB Axborot xizmati