Ichki ishlar vaziri oʻrinbosari polkovnik Ramazon Ashropov Jeneva shahrida (Shveysariya) oʻtkazilayotgan BMTning Irqiy kamsitishni tugatish qoʻmitasining 117-sessiyasida ishtirok etdi
2026-04-23 17:50:00 / Yangiliklar
Joriy yilning 21-aprel kuni Jeneva shahrida BMTning Irqiy kamsitishni tugatish qoʻmitasining 117-sessiyasi oʻz ishini boshladi.
Oʻzbekiston Respublikasidan mazkur sessiyada ishtirok etish uchun Ichki ishlar vaziri oʻrinbosari – Tergov departamenti boshligʻi Ramazon Ashropov, Inson huquqlari boʻyicha Milliy markaz direktori oʻrinbosari Dilnoza Muratova, Oliy Majlis Senati aʼzosi Gulnora Marufova, Oliy sud raisining birinchi oʻrinbosari Alisher Usmanov, Millatlararo munosabatlar va xorijdagi vatandoshlar masalalari boʻyicha qoʻmita raisi oʻrinbosari Bekzod Shukurov, Maktabgacha va maktab taʼlimi vaziri oʻrinbosari Farxod Boqiyev hamda mamlakatimizning boshqa vakillari ishtirok etdi.
Mamlakatimiz delegatsiyasi aʼzolari sessiya davomida soʻz olib, xalqaro tadbir ishtirokchilariga Oʻzbekiston Respublikasi tomonidan BMT Bosh assambleyasining 1965-yil 21-dekabrdagi rezolyutsiyaga muvofiq qabul qilingan Irqiy kamsitishning barcha shakllarini tugatish toʻgʻrisidagi xalqaro konvensiya qoidalarini bajarilishi yuzasidan XII-XIV birlashgan davriy maʼruzalar doirasida amalga oshirilgan ishlar boʻyicha axborotlar taqdim etdi.
Shuningdek, sessiyada xalqaro tadbir ishtirokchilarining savollariga mamlakatimiz delegatsiyasi barcha aʼzolari tomonidan batafsil javoblar berildi.
Maʼlumot uchun: Oʻzbekiston Respublikasi Irqiy kamsitishning barcha shakllarini tugatish toʻgʻrisidagi xalqaro konvensiyaga 1995-yil 31-avgust kuni qoʻshilgan.
IIV huzuridagi Tergov departamenti Axborot xizmati