Samarqand shahrida 2026-yil 20-aprel kuni “Transmilliy narkotahdidlarga qarshi kurashish: sogʻliqni saqlash, xavfsizlik va barqaror rivojlanish” mavzusidagi xalqaro forum doirasida IV seksiya yigʻilishi boʻlib oʻtdi
2026-04-23 00:40:00 / Yangiliklar
Unda Oʻzbekiston Respublikasi Kriminologiya tadqiqot instituti boshligʻi, polkovnik, yuridik fanlar boʻyicha falsafa doktori Berdialiyev Baxtiyor Erkinovich maʼruza qildi.
Maʼruza davomida institut boshligʻi tomonidan narkotiklar nazorati sohasida fan, maʼlumotlar va innovatsion texnologiyalarni joriy etish boʻyicha qator muhim takliflar ilgari surildi.
Xususan, sunʼiy intellektga asoslangan narkotik vositalar monitoringi (AI-Narko-Monitor) va ochiq manbalar tahlili (OSINT) tizimlarini joriy etish, blokcheyn tranzaksiyalarini tahlil qilish va DeFi muhitida moliyaviy oqimlarni kuzatish mexanizmlarini rivojlantirish taklif etildi.
Shuningdek, hududiy xavfsizlikni taʼminlash maqsadida idoralararo integratsiyalashgan “Domain Awareness System” kabi raqamli platformalarni milliy sharoitga moslashtirish, aqlli videokuzatuv tizimlari va kriminogen “heat map” xaritalarini joriy etish zarurligi taʼkidlandi.
Maʼruzada zamonaviy narkotahdidlar raqamli texnologiyalar bilan uygʻunlashib, gibrid xavfga aylanayotgani qayd etilib, ularga qarshi kurashishda ilmiy tahlil va prognostik modellarga asoslangan yondashuvlarni keng qoʻllash muhimligi urgʻulandi.
Tadbir ishtirokchilari Samarqand forumini narkotrafikka qarshi kurashishda xalqaro hamkorlikni mustahkamlashga xizmat qiluvchi muhim platforma sifatida baholadilar.
Oʻzbekiston Respublikasi Kriminologiya tadqiqot instituti