O‘zbеkiston Rеspublikаsi Ichki ishlаr vаzirligi

Ichki ishlar organlarida “Sogʻlom oila – sogʻlom jamiyat” gʻoyasini tatbiq etish, oilaviy qadriyatlarni saqlash va rivojlantirish, yoshlarni mustaqil hayotga tayyorlash, dunyoqarashi va maʼnaviyatini yuksaltirish, namunali oilalarning hayotiy tajribalarini ommalashtirish hamda Oʻzbekiston Respublikasi IIVning 2022-yil 15-fevral kunidagi “Ichki ishlar organlarida “Namunali oila” koʻrik-tanlovini oʻtkazish toʻgʻrisida”gi tegishli buyrugʻi ijrosini taʼminlash maqsadida joriy yilning 20-aprel kuni viloyat Ichki ishlar organlari xodimlari oilalari oʻrtasida “Namunali oila” koʻrik tanlovi oʻtkazildi.

Koʻrik-tanlov ishtirokchilari “Tanishtiruv”, “Bu mening oilam” nomli eng yaxshi foto surat va videoroliklar hamda “Biz kitobxon oilamiz” badiiy va mumtoz adabiyotlardan savol-javob shartlarida oʻzlarining bilim va zukkoliklari boʻyicha bellashuvlar olib borishdi. Shuningdek ishtirokchi xodimlar va ularning oila aʼzolari madaniyat va sanʼatdagi oʻz isteʼdod va qobiliyatlarini namoyon etishdi.

Oʻta qizgʻin bahs va munozarali baxslar yakunida, faxrli 3-oʻringa Qiziriq tumani IIB Tashkiliy boʻlinma murojaatlar bilan ishlash guruhi katta inspektori mayor Hamrayev Ilxom Nomozovich oilasi, 2-oʻringa viloyat IIB Maʼnaviy maʼrifiy ishlar va kadrlar bilan taʼminlash xizmati tashkiliy muvofiqlashtirish guruhi bosh inspektori mayor Qurbonaliyev Bekzod Abdumalik oʻgʻli oilasi munosib deb topilgan boʻlsa, Termiz tumani IIB Tashkiliy boʻlinma navbatchilik qismi katta inspektor mayor Amanov Alisher Xusanovichning oilasi 1-oʻringa munosib deb topilib, mazkur koʻrik-tanlovning respublika bosqichiga yoʻllanmani qoʻlga kiritdi.

Mazkur tanlov xodimlar va ularning oila aʼzolarining isteʼdodini yuzaga chiqarish, yosh avlodni vatanparvarlik ruhida tarbiyalash, ichki ishlar organlari tizimida xizmat qilayotgan xodimlar va ularning oilalarini har tomonlama qoʻllab-quvvatlashda muhim omil boʻldi desak, mubolagʻa boʻlmaydi.

Surxondaryo viloyati IIB Axborot xizmati