Qashqadaryo viloyatida huquqni muhofaza qiluvchi organlar rahbarlari ishtirokida tergov sifatini oshirishga bagʻishlangan seminar oʻtkazildi
2026-04-19 10:35:00 / Yangiliklar
Mamlakatimizda qonun ustuvorligini taʼminlash, fuqarolarning huquq va erkinliklarini ishonchli himoya qilish hamda odil sudlovni amalga oshirishda tergov jarayonining sifati alohida ahamiyat kasb etadi.
Bu borada huquqni muhofaza qiluvchi organlar oʻrtasidagi hamkorlikni mustahkamlash, amaliyotda uchrayotgan muammolarni bartaraf etish va ilgʻor tajribalarni joriy etish ustuvor vazifalardan biri.
Shu maqsadda, Qashqadaryo viloyati prokurori B.Sаyipov, viloyat IIB boshligʻi Abduvohid Ismoilov hamda viloyat sudi raisi Anvar Elmurodov boshchiligida oʻtkazilgan seminar “Tergov sifatini oshirish” yuzasidan tashkil etildi.
Unda hududiy huquqni muhofaza qiluvchi organlar xodimlari, tergovchilar va sud-huquq tizimi vakillari ishtirok etdi.
Tadbir davomida jinoyat ishlarini tergov qilishda qonun ustuvorligini taʼminlash, dalillarni toʻgʻri va qonuniy yigʻish, protsessual xatolarning oldini olish masalalari atroflicha muhokama qilindi.
Shuningdek, tergov jarayonida zamonaviy axborot texnologiyalaridan samarali foydalanish, fuqarolarning huquq va manfaatlarini ishonchli himoya qilish hamda ishlarni sudga qadar puxta tayyorlash yuzasidan amaliy tavsiyalar berildi.
Seminar yakunida masʼullarga tergov sifatini yanada oshirish, jinoyatlarni barvaqt aniqlash va adolatli qarorlar qabul qilinishiga erishish boʻyicha aniq vazifalar yuklatildi.
Bu kabi seminarlarni muntazam ravishda tashkillashtirish belgilab olindi.
Qashqadaryo viloyati IIB Axborot xizmati