IIV Jamoat xavfsizligi departamenti tomonidan Chilonzor tajribasini joriy etish boʻyicha oʻquv yigʻini tashkil etildi
2026-04-19 15:00:00 / Yangiliklar
IIV Jamoat xavfsizligi departamenti tomonidan huquqbuzarliklar profilaktikasi xizmati rahbar xodimlari uchun Chilonzor tajribasini amaliyotga tatbiq etishga bagʻishlangan oʻquv yigʻini tashkil etildi.
Unda Qoraqalpogʻiston Respublikasi IIV, Toshkent shahri va viloyati IIBB hamda barcha viloyatlar IIBlarining huquqbuzarliklar profilaktikasi boshqarmalari boshliqlari ishtirok etdi.
Oʻquv jarayonida tinglovchilarga Chilonzor tumanida samarali yoʻlga qoʻyilgan ish tajribasi atroflicha tushuntirildi.
Xususan, aholi muammolarini manzilli hal etish, mahallalarda xavfsiz muhitni shakllantirish, huquqbuzarliklarni barvaqt oldini olish, kriminogen vaziyatni tahlil qilish va xavf-xatarlarni baholash kabi yoʻnalishlar boʻyicha amaliy koʻnikmalar berildi.
Shuningdek, rahbar xodimlar media va jamoatchilik bilan samarali muloqot oʻrnatish, narkojinoyatlar va kiberjinoyatlarga qarshi kurashish, tizimda korrupsiya holatlarining oldini olish, fuqarolar murojaatlari hamda jinoyatlar haqidagi xabarlar bilan ishlash boʻyicha bilimlarini mustahkamladilar.
Tadbir yakunida olingan bilim va koʻnikmalarni hududlarda keng joriy etish, Chilonzor tajribasini tizimli ravishda tatbiq qilish orqali jamoat xavfsizligini taʼminlash samaradorligini yanada oshirish vazifalari belgilab olindi.
IIV Jamoat xavfsizligi departamenti Axborot xizmati