Guliston shahar “Obod yurt” mahallasida Sirdaryo viloyati IIB boshligʻining sayyor qabuli oʻtkazildi
2026-04-18 12:40:00 / Yangiliklar
Joriy yilning 13-mart kuni davlatimiz rahbari raisligida oʻtkazilgan videoselektor yigʻilishida aholi murojaatlari bilan ishlash tizimini tubdan takomillashtirish masalasiga alohida eʼtibor qaratilib endilikda mazkur yoʻnalishda eskicha yondashuvlardan voz kechib, yanada samarali, manzilli hamda natijador tizimni yoʻlga qoʻyish zarurligi topshirigʻi berilgan edi.
Mazkur vazifalar ijrosini taʼminlash maqsadida Sirdaryo viloyati ichki ishlar boshqarmasi boshligʻi tomonidan murojaatlar soni boshqa hududlarga qaraganda yuqori boʻlgan mahallalarda aholi bilan bevosita muloqotni kuchaytirish, muammolarni joyida oʻrganish va ularga tezkor yechim topishga qaratilgan manzilli sayyor qabullar oʻtkazib kelinmoqda.
Navbatdagi ana shunday sayyor qabul Guliston shahrining “Obod yurt” mahallasida boʻlib oʻtdi. Unda viloyat ichki ishlar boshqarmasi boshligʻi,mahalla yettiligi hamda mahalla aholisi ishtirok etdi.
Qabul davomida 20 nafarga yaqin fuqarolardan jami 17 ta murojaat, taklif va tashabbuslar bildirildi. Murojaatlar asosan bandlik, moddiy yordam olish, probatsiya hisobidan shartli ozod qilish masalalariga bogʻliq boʻldi.
Bildirilgan murojaatlar joyida masʼullar ishtirokida koʻrib chiqilib, ularning koʻp qismiga tezkor yechim topildi. Qoʻshimcha oʻrganish talab etiladigan masalalar yuzasidan esa muddatlar belgilanib ijrosi boshqarma boshligʻi tomonidan alohida nazoratga olindi.
Fuqarolar murojaatlariga tezkor va samarali yechim topish, shuningdek, aholi orasida davlat organlariga boʻlgan ishonchni yanada mustahkamlashga qaratilgan sayyor qabullar hududlarda davom etmoqda.
Sirdaryo viloyati IIB Axborot xizmati