O‘zbеkiston Rеspublikаsi Ichki ishlаr vаzirligi

Menejment va Zamonaviy Texnologiyalar Universiteti (UMFT)da ichki ishlar tizimi vakillari ishtirokida dolzarb mavzuga bagʻishlangan davra suhbati tashkil etildi. Mazkur tadbir yoshlar oʻrtasida huquqbuzarliklarning oldini olish, ularning huquqiy ongi va madaniyatini yuksaltirishga qaratilgani bilan ahamiyat kasb etdi.

Tadbir mehmoni sifatida Ichki ishlar vazirligi Akademiyasi magistratura tinglovchisi, podpolkovnik Sharipov Shoxrux Shodiyevich ishtirok etdi. U oʻz nutqida bugungi kunda jinoyatchilikning oldini olish, ayniqsa yoshlar orasida uchrayotgan huquqbuzarliklarning sabab va omillari haqida batafsil maʼlumot berdi.

Davra suhbati davomida talabalar bilan ochiq muloqot tashkil etildi hamda ularni qiziqtirgan savollarga batafsil javoblar berildi. Xususan, yoshlarni turli salbiy illatlardan asrash, ularni toʻgʻri yoʻlga yoʻnaltirish, huquqiy ong va madaniyatni shakllantirish masalalariga alohida eʼtibor qaratildi.

Shuningdek, tadbirdan soʻng ichki ishlar organlari xodimlari universitet rahbariyati bilan uchrashuv oʻtkazdilar. Unda oʻzaro hamkorlikni yanada mustahkamlash, yoshlar bilan ishlash samaradorligini oshirish hamda profilaktik tadbirlarni tizimli tashkil etish masalalari muhokama qilindi.

Bundan tashqari, jinoyatchilikka moyilligi mavjud boʻlgan ayrim talabalar bilan alohida profilaktik suhbatlar oʻtkazildi. Ushbu suhbatlar davomida ularning muammolari oʻrganilib, toʻgʻri yoʻlga yoʻnaltirish hamda zarur tavsiyalar berildi.

Tadbir yakunida talabalarga qonunlarga hurmat bilan qarash, hushyor va masʼuliyatli boʻlish zarurligi yana bir bor eslatib oʻtildi. Qayd etilishicha, bunday uchrashuvlar yoshlar ongida jinoyatchilikka qarshi immunitetni shakllantirishda muhim ahamiyatga ega.

Yangi binoda tashkil etilayotgan bunday mazmundagi tadbirlar universitet hayotidagi muhim yangiliklardan biri sifatida baholanmoqda.