IIV Akademiyasi rahbariyati tomonidan yoʻl harakati xavfsizligi va probatsiya xizmatlari rahbarlari uchun oʻquv yigʻini tashkil etildi
2026-04-16 09:00:00 / Yangiliklar
Avval xabar qilinganidek, IIV Akademiyasida yoʻl harakati xavfsizligi va probatsiya xizmatlari boshliqlari uchun oʻquv yigʻini tashkil qilingan edi.
Akademiya boshligʻi Rustam Xatamov oʻquv yigʻini tinglovchilari bilan uchrashib, ichki ishlar organlari rahbarlari oldida turgan dolzarb talablarni yetkazdi.
Aytish joizki, muhtaram Prezidentimiz boshchiligida amalga oshirilayotgan izchil islohotlar davrida boshqaruv kadrlarining jamiyat hayotidagi oʻrni va roli tobora oshib bormoqda.
Strategik rejalar ishlab chiqish, maqsad va vazifalarni aniq belgilash, puxta oʻylangan qarorlar qabul qilish, jamoani toʻgʻri yoʻnaltirish har bir rahbar faoliyatining muhim mezoniga aylanmoqda.
Ayniqsa xalq bilan doimiy muloqotda boʻlish, aholining dardu tashvishi bilan yashash, muammolarini oʻz vaqtida hal etish, murojaatlariga tezkorlik bilan munosabat bildirish jamiyatda inson manfaatlarini taʼminlashning ustuvor tamoyillari etib belgilangan.
Prezidentimiz davrning bu oʻtkir talablarini tushunmagan rahbarlarni xalqimiz ham, hayotning oʻzi ham qabul qilmasligini alohida taʼkidlagandi.
Ochiq muloqot tarzida oʻtgan uchrashuvda ichki ishlar organlari tizimidagi keng qamrovli islohotlar, kadrlar siyosatining ustuvor yoʻnalishlari, soha uchun boshqaruv kadrlarini tayyorlash maqsadida akademiya magistraturasida yoʻlga qoʻyilgan ilgʻor yondashuvlar, rahbar xodimlarni tanlash va lavozimga tayinlashda eʼtibor qaratiladigan eng muhim jihatlar, boshqaruv kompetensiyalari xususida soʻz bordi.
Akademiya boshligʻi rahbarlik fazilatlariga toʻxtalib, “har bir rahbar zamon bilan hamnafas qadam tashlashi, yetuk bilim va koʻnikmaga ega boʻlishi, faoliyatini doimiy isloh qilib borishi, islohotlarning mazmun-mohiyatini anglagan holda ularni hayotga samarali tatbiq etishi, eng muhimi, uzoqni koʻra olishi lozim”, dedi.
Uchrashuvda sohaviy xizmat rahbarlariga tizimning faoliyat samaradorligini oshirishga qaratilgan amaliy tavsiyalar berildi.
Taʼkidlash joizki, uch kunlik oʻquv yigʻini davomida tinglovchilar uchun dolzarb mavzularni qamrab olgan interfaol mashgʻulotlar tashkil qilindi.
Ilgʻor tajribalar oʻzlashtirilib, muammolar va ularning yechimlari tahlil qilindi.
Mashgʻulotlar yakunida bilim va koʻnikmalarni baholash maqsadida tinglovchilardan yakuniy sinovlar qabul qilindi.
IIV Akademiyasi Axborot xizmati