“Ichki ishlar vaziri kubogi” futbol musobaqasida Qashqadaryo viloyati IIB jamoasi penaltilar seriyasida gʻalaba qozonib, bosh sovringa ega boʻldi
2026-03-01 00:00:00 / Yangiliklar
Davlatimiz rahbari tomonidan sportni yanada rivojlantirish, aholi, shu jumladan davlat idoralari xodimlari oʻrtasida sogʻlom turmush tarzini keng targʻib etish boʻyicha muhim vazifalar belgilab berilgan. Unga koʻra, vazirlik va idoralarda kamida 4 ta sport turi boʻyicha yiliga ikki marta sport musobaqalarini muntazam ravishda tashkil etish hamda gʻolib va faol ishtirokchilarni munosib taqdirlash tizimi yoʻlga qoʻyilgan.
Ichki ishlar organlari xodimlari oʻrtasida ham sogʻlom turmush tarzini keng targʻib etish, jamoaviy harakatlanish koʻnikmalarini yanada rivojlantirish va oʻzaro sogʻlom raqobatni shakllantirish maqsadida joriy yilning 1-aprelidan 15-aprel sanasiga qadar futbol boʻyicha “Ichki ishlar vaziri” kubogi musobaqasi oʻtkazildi.
Mamlakatimizdagi barcha hududiy ichki ishlar organlari jamoalari ishtirokida oʻtkazilgan musobaqaning final bahsida Toshkent shahar IIBB jamoasi Qashqadaryo viloyati IIB vakillariga qarshi saf tortdi.
JAR stadionida boʻlib oʻtgan final oqshomida, oʻyin boshidan nominal mezbonlar tezkor hujumlar bilan raqib jarima maydoni atrofida xavfli vaziyatlarni yuzaga keltirgan boʻlsa, Qashqadaryo viloyati jamoasi qarshi hujumlar bilan javob qaytardi. Ikki boʻlimda ham Toshkent shahar ichki ishlar bosh boshqarmasi vakillari koʻplab imkoniyatlarga ega boʻldi, biroq oʻyinning asosiy vaqtida darvozalar daxlsizligi saqlab qolindi.
Shu tariqa chempion nomi penaltilar seriyasida aniqlandi. Seriyada 4:2 hisobida gʻalaba qozongan Qashqadaryo viloyati IIB jamoasi futbol boʻyicha “Ichki ishlar vaziri kubogi” sohibiga aylandi.
Taqdirlash marosimida ishtirok etgan IIV rahbariyati va Oʻzbekiston Futbol Assotsiatsiyasi vakillari tomonidan uchinchi oʻrinni qoʻlga kiritgan Andijon viloyati IIB jamoasiga bronza medallar hamda 40 million soʻm mukofoti, ikkinchi oʻrinni egallagan Toshkent shahar IIBB jamoasiga kumush medallar va 50 million soʻm mukofoti topshirildi. Chempionlar, Qashqadaryo viloyati vakillari esa oltin medallar, 60 million soʻm miqdorida mukofot va musobaqa kubogini qabul qilib oldilar.
Shu tariqa chinakam sport bayramiga aylanib ketgan musobaqa koʻtarinki ruhda yakuniga yetdi.