Sogʻlom avlod va barkamol jamiyatni shakllantirish maqsadida mamlakatimizda aholi oʻrtasida sogʻlom turmush tarzini qaror toptirish borasida amalga oshirilayotgan ishlar izchil davom etmoqda
2026-04-16 08:00:00 / Yangiliklar
Mamlakatimizda jismoniy tarbiya va sportni ommalashtirish, aholining sogʻlom turmush tarzini shakllantirish borasida izchil islohotlar amalga oshirilmoqda.
Xususan, Prezidentimiz raisligida oʻtkazilgan videoselektor yigʻilishida sohadagi ustuvor vazifalar belgilab olindi va ularning ijrosini taʼminlash maqsadida aniq chora-tadbirlar belgilandi. Ushbu yigʻilishda haftada bir kunni “sport kuni” sifatida belgilash tashabbusi ilgari surilib, bu kunda barcha vazirlik, idora va tashkilotlarda sport mashgʻulotlarini muntazam oʻtkazish vazifasi qoʻyildi. Bu esa davlat xizmatchilari oʻrtasida jismoniy faollikni oshirish, sogʻlom raqobat muhitini shakllantirish va mehnat samaradorligini yuksaltirishga xizmat qilmoqda.
Mazkur topshiriqlar ijrosini taʼminlash doirasida Ichki ishlar vaziri general-leytenant Aziz Tashpulatov masʼullar bilan birgalikda amalga oshirilayotgan ishlar bilan “JAR” sport majmuasida yaratilgan shart-sharoitlar alohida tanishdi.
Bu yerda faoliyat yuritayotgan turli sport toʻgaraklari, yoshlar, shuningdek xodimlar hamda ularning farzandlari uchun tashkil etilgan sport seksiyalari, ularda erishilayotgan natijalar yuksak baholandi. Ayniqsa, xodimlarning jismoniy holatini mustahkamlashda ilmiy yondashuvlarni qoʻllash, kunlik ratsionni nazorat qilish kabi masalalarning muhokama qilinishi sohaga zamonaviy yondashuv kirib kelayotganidan dalolat beradi.
Ichki ishlar vaziri tomonidan jangovar sport turlariga alohida urgʻu berish, xodimlarning jismoniy tayyorgarligini yanada kuchaytirish, kross-fit kabi intensiv mashgʻulotlarni amaliyotga keng joriy etish yuzasidan aniq topshiriqlar berildi. Shuningdek, mavjud infratuzilmadan samarali foydalanish, jumladan, sport majmuasining yozgi maydonlarini ham toʻliq ishga solish orqali mashgʻulotlarning qamrovini kengaytirish zarurligi taʼkidlandi.
Jismoniy tarbiya va sport sohasida amalga oshirilayotgan mazkur ishlar nafaqat tizim xodimlarining, balki butun jamiyatning, ayniqsa yoshlarning sogʻlom hayot tarzini shakllantirishda muhim oʻrin tutadi. Belgilangan vazifalarning izchil ijrosi esa kelgusida yanada yuqori natijalarga erishish uchun mustahkam zamin yaratadi.