IIV Akademiyasiga Turkiya Respublikasi Ichki ishlar vazirligining Giyohvandlik vositalariga qarshi kurashish boshqarmasi mudiri Osman Giray boshchiligidagi mutaxassislar keldi
2026-04-15 10:10:00 / Yangiliklar
Qardosh mamlakat vakillari dastlab Axborot-resurs markazi, magistratura, Taʼlim sifatini monitoring va nazorat qilish markazi, sport majmuasi hamda Maʼnaviyat va maʼrifat markazi faoliyati bilan tanishishdi. Ichki ishlar organlari uchun yuqori malakali kadrlar tayyorlash maqsadida taʼlim jarayonlariga joriy qilingan innovatsion yondashuvlarni koʻzdan kechirdilar.
Xalqaro anjumanlar xonasida mehmonlar ishtirokida uchrashuv oʻtkazilib, hamkorlikning muhim yoʻnalishlari yuzasidan fikr almashildi. Tomonlar Oʻzbekiston va Turkiya ichki ishlar vazirliklari oʻrtasida idoraviy hamkorlikning izchil rivojlanib borayotgani transmilliy jinoyatlarga qarshi kurashish, kadrlar salohiyatini oshirish, ilgʻor tajribalarni almashishga xizmat qilayotganini eʼtirof etdi.
Turkiyalik mutaxassislar bilan hamkorlikda oʻtkazilayotgan galdagi mashgʻulotlar manfaatli hamkorlikning amaliy ifodasi sifatida taʼlim samaradorligini yanada oshirishda muhim ahamiyat kasb etishi taʼkidlandi.
Muloqot chogʻida hamkorlik aloqalarini chuqurlashtirish, taʼlim dasturlarini kengaytirish, zamonaviy boshqaruv, jamoat xavfsizligi, kiberjinoyatlarga qarshi kurashish, ichki ishlar organlari faoliyatini raqamlashtirish va boshqa yoʻnalishlarda oʻzaro tajriba almashish, professor-oʻqituvchilar va taʼlim oluvchilar uchun malaka oshirish kurslarini tashkil etishga kelishib olindi.
Eslatib oʻtamiz, mazkur tashrif doirasida giyohvandlik vositalariga qarshi kurashishning dolzarb yoʻnalishlari va zamonaviy tendensiyalariga bagʻishlangan oʻquv mashgʻulotlari ham oʻtkazilmoqda. Toʻrt kun davom etadigan mashgʻulotlarga ixtisoslik kafedralari professor-oʻqituvchilari va kursantlar jalb qilingan.
IIV Akademiyasi Axborot xizmati