IIV rahbariyati tomonidan Toshkent shahri Mirobod tumanida joylashgan “Birodarlik”, “Temir yoʻlchilar” hamda “Tong yulduzi” mahallalarida xavfsiz muhit yaratish boʻyicha amaliy ishlar oʻrganildi
2026-04-14 18:50:00 / Yangiliklar
Toshkent shahrida xavfsiz muhit yaratish boʻyicha amaliy ishlar izchil davom etmoqda. Xususan, ichki ishlar vaziri oʻrinbosari general-mayor Mirzaraximov Baxodir Yuldoshevich tomonidan Mirobod tumanida joylashgan “Birodarlik”, “Temir yoʻlchilar” hamda “Tong yulduzi” mahallalarida olib borilayotgan ishlar oʻrganildi.
Oʻrganishlar davomida aholi xavfsizligini taʼminlash, jinoyatchilikning oldini olish hamda huquqbuzarliklarni barvaqt aniqlashga qaratilgan chora-tadbirlarga alohida eʼtibor qaratildi. Shuningdek, mahallalardagi bozorlar, yer osti yoʻlaklari va aholi gavjum joylardagi holatlar tahlil qilinib, ularda xavfsizlikni taʼminlash boʻyicha mavjud kamchiliklar koʻrib chiqildi.
Mazkur hududlarda videokuzatuv tizimlarini kengaytirish, yoritish moslamalarini yaxshilash, profilaktika inspektorlari faoliyatini kuchaytirish yuzasidan tegishli topshiriqlar berildi. Yer osti yoʻllarida sanitar holat, yoritish va xavfsizlik talablariga rioya etilishi yuzasidan ham amaliy choralar belgilandi.
Shu bilan birga, “mahalla yettiligi” — yaʼni mahalla raisi, profilaktika inspektori, yoshlar yetakchisi, xotin-qizlar faoli, nuroniylar va boshqa mutasaddilar hamkorligida ishlar samaradorligini oshirish masalalari muhokama qilindi. Ularning aholi bilan yaqin muloqotda boʻlib, muammolarni joyida hal etishi muhim ekani taʼkidlandi.
Tashrif yakunida masʼullarga har bir mahallada xavfsiz muhitni taʼminlash, fuqarolar tinchligi va osoyishtaligini mustahkamlash boʻyicha aniq vazifalar yuklatildi.
Transport va turizm obyektlarida xavfsizlikni taʼminlash Departamenti Axborot guruhi