Buxoroda iqtidorli yoshlar kashf etildi — Ichki ishlar boshqarmasi boshligʻi sovrini uchun fan olimpiadasi oʻtkazildi
2026-04-14 11:10:00 / Yangiliklar
Joriy yilning 13-aprel kuni Ichki ishlar vazirligi Buxoro akademik litseyida Buxoro viloyati Maktabgacha va maktab taʼlimi boshqarmasi tasarrufidagi umumtaʼlim maktablarining toʻqqizinchi sinf oʻquvchilari oʻrtasida huquqshunoslik, tarix va ingliz tili fanlaridan olimpiada tashkil etildi.
Buxoro viloyat ichki ishlar boshqarmasi boshligʻining tashabbusi bilan tashkil etilgan ushbu nufuzli bellashuvda viloyatimizning barcha tumanlaridan olti yuzga yaqin oʻquvchi ishtirok etdi.
Quvonarli jihati shundaki, oʻquvchilarning natijalari imtihon oʻtkazilgan auditoriyaning oʻzida sunʼiy intellekt imkoniyatlaridan keng foydalanilgan holda eʼlon qilindi.
Bu zamonaviy yondashuv olimpiadaning inson omili aralashuvisiz, mutlaqo shaffof va xolisona oʻtishini toʻliq taʼminladi.
Qizgʻin bahslarga boy boʻlgan olimpiada yakunlariga koʻra tarix fani boʻyicha Kogon shahridagi 8-maktab oʻquvchisi Istatbonu Axmedova eng yuqori natija bilan birinchi oʻrinni egalladi.
Ikkinchi oʻrin Shofirkon tumanidagi ixtisoslashtirilgan maktab oʻquvchisi Umidali Izzatovga nasib etgan boʻlsa, uchinchi oʻrinni Buxoro tumanidagi 25-maktab vakili Dilnura Qodirova hamda Kogon shahridagi 7-maktab oʻquvchisi Saidali Hamdamovlar oʻzaro boʻlishib olishdi.
Huquqshunoslik yoʻnalishida esa Gʻijduvon tumanidagi xususiy maktab oʻquvchisi Durdonaxon Nazarova va Shofirkon tumanidagi ixtisoslashtirilgan maktab oʻquvchisi Zarnigor Oʻktamovalar bilimda tengsiz ekanliklarini isbotlab, birinchi oʻrinni qoʻlga kiritishdi.
Xuddi shu xususiy maktabning yana bir iqtidorli vakili Shafiqa Sohibjonova ikkinchi oʻringa munosib koʻrildi. Uchinchi oʻrin Buxoro shahridagi 41-maktab oʻquvchisi Asilbek Narzullayevga nasib etdi.
Ingliz tili fanidan imtihon jarayonlari tinglab tushunish, oʻqib tushunish va grammatika yuzasidan murakkab topshiriqlarni oʻz ichiga olgan holda uch bosqichda tashkil etildi.
Mazkur yoʻnalishdagi murosasiz bahslarda Buxoro shahridagi 23-maktab oʻquvchisi Ruxshona Xayriddinova barchadan oʻzib ketib, mutlaq gʻoliblikni qoʻlga kiritdi.
Buxoro shahridagi Prezident maktabining iqtidorli oʻquvchilari Davron Saidov va Sabrina Nurullayevalar mos ravishda ikkinchi hamda uchinchi oʻrinlarni faxr bilan egallashdi.
Ushbu olimpiadaning asosiy maqsadi iqtidorli va bilimli oʻquvchilarni aniqlash hamda ularni har tomonlama qoʻllab-quvvatlashdan iboratdir. Bunday musobaqalar yoshlarning intellektual salohiyatini namoyon etishiga, oʻz ustida tinimsiz ishlashga boʻlgan qiziqishini yanada oshirishga xizmat qiladi.
Qolaversa, olimpiada oʻquvchilarda mustaqil fikrlash, tahlil qilish va mantiqiy xulosa chiqarish koʻnikmalarini rivojlantirib, kelgusida huquq-tartibot idoralari tizimida faoliyat yuritish niyatida boʻlgan yoshlar uchun mustahkam poydevor yaratadi.
Tarixni chuqur bilish va qonunlarga hurmat bilan qarash orqali oʻquvchilarda Vatanga sadoqat, yuksak masʼuliyat hamda qatʼiy fuqarolik pozitsiyasi shakllanadi.
Tadbir yakunida sovrinli oʻrinlarni qoʻlga kiritgan barcha oʻquvchilar Buxoro viloyat ichki ishlar boshqarmasi boshligʻining oʻrinbosari tomonidan televizor, changyutgich, mikrotoʻlqinli pech kabi qimmatbaho esdalik sovgʻalari va maxsus diplomlar bilan tantanali ravishda taqdirlandilar.
Xulosa qilib aytganda, mazkur bellashuv nafaqat bilimlarni sinovdan oʻtkazadigan, balki kelajakda yetuk, masʼuliyatli va vatanparvar kadrlarni tayyorlashga xizmat qiladigan gʻoyat ahamiyatli tarbiyaviy hamda taʼlimiy tadbirga aylandi.
Buxoro viloyati IIB Axborot xizmati