IIV Malaka oshirish institutida Xalqaro Qizil Xoch Qoʻmitasi bilan hamkorlik istiqbollari muhokama qilindi
2026-04-13 19:00:00 / Yangiliklar
Oʻzbekiston Respublikasi IIV Malaka oshirish institutida Xalqaro Qizil Xoch Qoʻmitasining Markaziy Osiyodagi mintaqaviy vakolatxonasi rahbarlari va mutaxassislari ishtirokida uchrashuv boʻlib oʻtdi.
Tadbir davomida oʻzaro hamkorlikni yanada mustahkamlash, ilgʻor xalqaro tajribalarni oʻrganish hamda insonparvarlik tamoyillarini huquqni muhofaza qilish amaliyotiga samarali joriy etish masalalari yuzasidan atroflicha fikr almashildi.
Shuningdek, xalqaro gumanitar huquq normalarini amaliyotga tatbiq etishda kadrlar salohiyatini oshirish, zamonaviy oʻquv-metodik yondashuvlarni keng joriy etish muhimligi alohida taʼkidlandi.
Uchrashuvda tinglovchilar uchun xalqaro gumanitar huquq boʻyicha oʻquv adabiyotlarini ishlab chiqish, oʻquv dasturlarini takomillashtirish va ularni amaliyot bilan uygʻunlashtirishning dolzarb jihatlari muhokama qilindi.
Bundan tashqari, oʻquv jarayoniga interaktiv usullarni joriy etish, professor-oʻqituvchilar malakasini oshirish hamda qoʻshma seminar va treninglar tashkil etish yuzasidan takliflar ilgari surildi.
Tomonlar oʻrtasidagi muloqotda kelgusida qoʻshma loyihalarni amalga oshirish, ilmiy-amaliy tadqiqotlarni yoʻlga qoʻyish, shuningdek, xalqaro ekspertlarni jalb etgan holda maxsus oʻquv kurslarini tashkil etish boʻyicha kelishuvlarga erishildi.
Uchrashuv yakunida hamkorlikni yangi bosqichga olib chiqishga qaratilgan aniq rejalar belgilab olindi.
IIV Malaka oshirish instituti