Qoraqalpogʻiston Respublikasi Vazirlar Kengashi raisi hamda Ichki ishlar vaziri ishtirokida kiberxavfsizlik masalalariga bagʻishlangan kengaytirilgan yigʻilish boʻlib oʻtdi
2026-04-11 11:10:00 / Yangiliklar
Qoraqalpogʻiston Respublikasi Vazirlar Kengashida respublikada kiberxavfsizlikni taʼminlash, zamonaviy axborot tahdidlariga qarshi kurashish va fuqarolarni himoya qilish masalalariga bagʻishlangan kengaytirilgan yigʻilish boʻlib oʻtdi. Unda barcha masʼul rahbarlar, huquqni muhofaza qiluvchi organlar vakillari hamda tuman va shahar hokimliklari videoselektor aloqa orqali ishtirok etdilar.
Yigʻilishda bugungi kunda axborot texnologiyalari jadal rivojlanayotgan bir sharoitda kiberjinoyatlar soni ortib borayotgani, ayniqsa, internet orqali firibgarlik, shaxsiy maʼlumotlarni noqonuniy qoʻlga kiritish va bank kartalari bilan bogʻliq jinoyatlar dolzarb masalaga aylangani alohida taʼkidlandi.
Qoraqalpogʻiston Respublikasi ichki ishlar vaziri, polkovnik Baxtiyar Torebekov oʻz maʼruzasida hududda fuqarolarning kiberjinoyatlar qurboniga aylanib qolish holatlari, ularning kelib chiqish sabablari hamda bu kabi holatlarning oldini olish borasida amalga oshirilayotgan chora-tadbirlar haqida batafsil maʼlumot berdi.
Shu bilan birga, kiberjinoyatlarni barvaqt aniqlash, aholining axborot xavfsizligi boʻyicha bilim va koʻnikmalarini oshirish, profilaktika ishlarini kuchaytirish, shuningdek, tegishli tashkilotlar oʻrtasida oʻzaro hamkorlikni yanada mustahkamlash yuzasidan aniq vazifalar belgilab berildi.
Yigʻilish yakunida masʼul rahbarlarga kiberxavfsizlikni taʼminlash, fuqarolarni turli xil internet firibgarliklaridan ogohlantirish va bu borada tushuntirish ishlarini kengaytirish boʻyicha topshiriqlar berildi.
Qoraqalpogʻiston Respublikasi IIV Axborot xizmati