Bosh prokurorning birinchi oʻrinbosari Bahriddin Valiyev rahbarligida Prezident 2026-yil 5-yanvardagi PQ–1-sonli qarori ijrosini taʼminlash yuzasidan Toshkent viloyati Ichki ishlar bosh boshqarmasida oʻquv-amaliy seminar tashkil etildi
2026-04-09 11:40:00 / Yangiliklar
Unda qaror ijrosiga masʼul Respublika idoralararo muvofiqlashtirish shtabi aʼzolari, huquqni muhofaza qiluvchi organlar, IIV akademiyasi, Jamoat xavfsizligi universiteti, Toshkent davlat yuridik universiteti hamda Kriminologiya tadqiqot instituti professor-oʻqituvchilari, shuningdek, hududiy prokurorlar, ichki ishlar organlari rahbarlari va “mahalla yettiligi” vakillari ishtirok etdi.
Seminarda Toshkent viloyatida jinoyatchilikning barvaqt profilaktikasini samarali tashkil etish, mahallalarda xavfsiz muhit yaratish hamda ilmiy yondashuvlar asosida tizimli ishlarni yoʻlga qoʻyish masalalari muhokama qilindi.
Qayd etilganidek, soʻnggi 3-yilda “qizil toifa”ga kiritilgan 40 ta mahalla 5 ta oliy taʼlim muassasasiga biriktirilib, olim va mutaxassislar tomonidan chuqur oʻrganishlar olib borilgan. Natijada jinoyatchilik sabablari va shart-sharoitlarini bartaraf etishga qaratilgan aniq taklif va tavsiyalar ishlab chiqilgan.
Shuningdek, oilaviy nizolarni mediatsiya orqali hal etish, xotin-qizlarga nisbatan tazyiq va zoʻravonliklarning oldini olish, yoshlar bandligini taʼminlash va ular bilan manzilli ishlash, shuningdek “Huquq maktabi” platformasi orqali onlayn taʼlimni yoʻlga qoʻyish masalalariga alohida eʼtibor qaratildi.
Tadbirda mahallalarda jinoyatchilikni kamaytirishda ilmiy diagnostika usulini joriy etish zarurligi taʼkidlandi. Yetakchi oliygohlar ilmiy salohiyatini “qizil” mahallalarga yoʻnaltirish orqali huquqbuzarliklarning ijtimoiy-psixologik omillarini chuqur tahlil qilish va ilmiy asoslangan profilaktika tizimini shakllantirish belgilandi.
Respublika idoralararo muvofiqlashtirish shtabining Toshkent viloyatidagi oʻrganishlari davom etmoqda.
Toshkent viloyati IIBB Axborot xizmati