IIV rahbariyati tomonidan Qoraqalpogʻiston Respublikasi IIV Tezkor vazifalarni bajaruvchi safarbarlik otryadining xizmat faoliyati oʻrganildi
2026-04-08 11:00:00 / Yangiliklar
Ichki ishlar vazirligi tizimida xizmat samaradorligini oshirish, shaxsiy tarkibning jangovar va xizmat tayyorgarligini yanada mustahkamlash maqsadida tizimli oʻrganishlar olib borilmoqda.
Shu munosabat bilan Ichki ishlar vazirining oʻrinbosari, general-mayor Mirzaraximov Baxodir Yuldoshevich tomonidan Qoraqalpogʻiston Respublikasi Ichki ishlar vazirligi Tezkor vazifalarni bajaruvchi safarbarlik otryadining xizmat faoliyati oʻrganildi.
Oʻrganish jarayonida otryadning moddiy-texnik taʼminoti, shaxsiy tarkibning jismoniy va jangovar tayyorgarligi, xizmat intizomi hamda tezkor vaziyatlarga shayligi atroflicha tahlil qilindi. Shuningdek, xodimlarning kundalik xizmat faoliyati, jamoat tartibini saqlash va favqulodda holatlarda harakat qilish koʻnikmalari amalda sinovdan oʻtkazildi.
General-mayor tomonidan otryad faoliyatida erishilgan ijobiy natijalar alohida qayd etildi. Ayni paytda mavjud kamchiliklar yuzasidan aniq topshiriq va tavsiyalar berildi. Xususan, shaxsiy tarkibning kasbiy mahoratini oshirish, zamonaviy axborot texnologiyalaridan samarali foydalanish hamda xizmat intizomini yanada mustahkamlash boʻyicha ustuvor vazifalar belgilab berildi.
Shu bilan birga, xodimlar bilan ochiq muloqot oʻtkazilib, ularning fikr va takliflari tinglandi. Xizmat sharoitlarini yanada yaxshilash, ijtimoiy himoyani kuchaytirish masalalariga ham alohida eʼtibor qaratildi.
Mazkur oʻrganish ishlari tizimda xizmat samaradorligini oshirish, jamoat xavfsizligini taʼminlash va fuqarolar tinchligini mustahkamlashga xizmat qilishi taʼkidlandi.
Transport va turizm obyektlarida xavfsizlikni taʼminlash Departamenti Axborot guruhi