IIV rahbariyati tomonidan Qoraqalpogʻiston Respublikasi Transport obyektlarida xavfsizlikni taʼminlash boshqarmasida bir qator muhim obyektlar oʻrganildi
2026-04-06 18:30:00 / Yangiliklar
Ichki ishlar vazirining oʻrinbosari, general-mayor Baxodir Mirzaraximov tomonidan Qoraqalpogʻiston Respublikasida transport obyektlarida xavfsizlikni taʼminlash borasida oʻrganish ishlari olib borildi.
Ushbu oʻrganishlar doirasida, avvalo, aeroportlarda xavfsizlikni taʼminlash boshqarmasi faoliyati atroflicha koʻzdan kechirildi. Aeroport hududida yoʻlovchilar xavfsizligini taʼminlash, noqonuniy harakatlarning oldini olish, zamonaviy texnik vositalardan foydalanish darajasi va xodimlarning xizmat olib borish sifati tahlil qilindi. Shuningdek, mavjud muammolar aniqlanib, ularni bartaraf etish yuzasidan aniq topshiriqlar berildi.
Shundan soʻng, temir yoʻl vokzali hududida ham xavfsizlikni taʼminlash holati oʻrganildi. Yoʻlovchilar oqimi yuqori boʻlgan ushbu maskanda jamoat tartibini saqlash, huquqbuzarliklarning oldini olish, shuningdek, favqulodda vaziyatlarga tayyorgarlik darajasi alohida eʼtiborga olindi. Xodimlarning xizmat intizomi, fuqarolar bilan muomala madaniyati va tezkorlik darajasi ham muhokama qilindi.
Oʻrganishlar yakunida aniqlangan kamchiliklarni bartaraf etish, transport obyektlarida xavfsizlikni yanada kuchaytirish, zamonaviy yondashuvlarni joriy etish hamda aholiga qulay va xavfsiz muhit yaratish boʻyicha tegishli koʻrsatmalar berildi.
Mazkur tadbirlar transport infratuzilmasida xavfsizlikni mustahkamlash, fuqarolarning tinch va osoyishta harakatlanishini taʼminlashga xizmat qiladi.
Transport va turizm obyektlarida xavfsizlikni taʼminlash Departamenti Axborot guruhi