Yurtimizning uzoq tumanlarida xavfsizlikni taʼminlash hamda aholiga xizmat koʻrsatishni yaxshilash maqsadida Sariosiyo tumani Ichki ishlar boʻlimining yangi zamonaviy binosi foydalanishga topshirildi
2026-04-06 07:00:00 / Yangiliklar
Davlatimiz rahbarining ichki ishlar tizimini modernizatsiya qilish, xodimlar uchun munosib xizmat sharoitlarini yaratish borasida koʻrsatayotgan eʼtibori natijasida eng chekka hududlarda ham yangi-yangi binolar qad koʻtarib, zamonaviy imkoniyatlar yaratilmoqda.
Bugun Sariosiyo tumani markazida 50 sotixli maydonda Ichki ishlar boʻlimining yangi binosi barpo etilib foydalanishga topshirildi. Binoning tantanali ochilish marosimida Ichki ishlar vaziri general-leytenant Aziz Tashpulatov, Sariosiyo tumani hokimi, ichki ishlar organlari xodimlari, soha faxriylari va nuroniylar ishtirok etishdi.
Ichki ishlar vaziri zamonaviy talablarga javob beradigan, xodimlarning jismoniy va maʼnaviy yuksalishlari va tuman aholisining xavfsizligi hamda farovonligi uchun xizmat qiladigan ushbu bino Prezidentimizning sohaga qaratayotgan eʼtiborlarining yana bir oʻziga xos koʻrinishi ekanligini taʼkidlab oʻtdi.
Darhaqiqat, yangi binoda zaruriy barcha texnik vositalar bilan jihozlangan xizmat xonalari bilan bir qatorda, xodimlarning salomatligi va jismoniy tayyorgarligi uchun moʻljallangan sport va “Workout” maydonchalarida barcha qulayliklar yaratilgan.
Eʼtiborli jihati tuman ichki ishlar organlari tizimida uzoq yillar xizmat qilgan xodimlar uchun alohida “Faxriylar xonasi” tashkil etilganligi tadbir ishtirokchilari tomonidan eʼtirof etildi.
Ichki ishlar vaziri tomonidan xodimlarga yaratilgan sharoitlar oʻrganilib, masʼullarga aholi murojaatlari bilan ishlashni takomillashtirish, binoga tashrif buyurgan har bir yurtdoshimiz uchun zaruriy qulayliklarni tashkil etish boʻyicha tegishli koʻrsatmalar berildi.
Yangi Oʻzbekistonda xalq manfaatlarini taʼminlash yoʻlida olib borilayotgan ulkan islohotlar davomiyligining yana bir isboti boʻlgan binoda ichki ishlar boʻlimi xodimlari oʻz burchlariga sadoqat bilan zamonaviy sharoitlarda xizmatni davom ettirishadi.