“Xavfsiz va sogʻlom yurt” tezkor-profilaktik oyligi davomida Toshkent viloyati IIBBning barcha sohaviy xizmatlari tomonidan amalga oshirilgan ishlar raqamlarda
2026-04-05 09:35:00 / Yangiliklar
Oʻzbekiston Respublikasi Ichki ishlar vazirligining tegishli farmoyishiga muvofiq, Respublika boʻyicha, jumladan Toshkent viloyatida ham joriy yilning 1-martidan 1-apreliga qadar “Xavfsiz va sogʻlom yurt” keng qamrovli tezkor-profilaktik tadbirining birinchi bosqichi amalga oshirildi.
Tadbirlar davomida ichki ishlar organlari hamda boshqa huquqni muhofaza qiluvchi idoralar tomonidan jinoyatchilikka qarshi kurashish, aholi xavfsizligini taʼminlash va huquqbuzarliklarning oldini olishga qaratilgan keng koʻlamli ishlar olib borildi.
Jumladan, bir oy davomida Toshkent viloyati IIBB va uning quyi boʻlinmalari tomonidan 3 600 dan ortiq tezkor-qidiruv tadbiri oʻtkazildi.
Amalga oshirilgan tadbirlar natijasida turli yoʻnalishdagi 314 ta jinoyat fosh etildi. Shundan 115 tasi avvalgi yillarda sodir etilgan jinoyatlarga toʻgʻri keladi. Bu esa ushbu yoʻnalishda tizimli ishlar izchil davom ettirilayotganini koʻrsatmoqda.
Qidiruv tadbirlari davomida sud va tergov organlaridan yashiringan 92 nafar shaxs ushlanib, 97 nafar bedarak yoʻqolgan fuqaro topildi va oilasiga qaytarildi.
Giyohvandlikka qarshi kurashish yoʻnalishida 402 ta holat aniqlanib, tadbirlar davomida 23,6 kg giyohvandlik vositalari hamda 40 244 dona kuchli taʼsir qiluvchi dori vositalari noqonuniy muomaladan olindi. Shuningdek, 17 nafar “zakladchik” ushlanib, 3 708 dona “zakladka” musodara qilindi.
Uyushgan jinoyatchilikka qarshi kurashish doirasida 282 ta holat aniqlanib, noqonuniy saqlanayotgan qurol-yarogʻlar tegishli tartibda olib qoʻyildi. Xususan, 13 dona ov quroli, 18 dona pnevmatik qurol, 427 dona oʻq-dori hamda 585 dona sovuq qurollar (bita, kastet va turli xil pichoqlar) musodara qilindi.
Korrupsiya va iqtisodiy jinoyatlarga qarshi kurashish yoʻnalishida 2 272 ta holat aniqlangan boʻlsa, terrorizm va ekstremizmga qarshi kurashish doirasida 362 ta holat fosh etildi.
Umuman olganda, “Xavfsiz va sogʻlom yurt” tadbirining birinchi bosqichi hududlarda jinoyatchilikni jilovlash hamda aholi xavfsizligini taʼminlashda muhim ahamiyat kasb etdi. Profilaktika va tezkor choralarni samarali qoʻllash jinoyatlarning oldini olishda muhim omil boʻlib, bu boradagi ishlar izchil davom ettirilmoqda.
Toshkent viloyati IIBB Axborot xizmati