O‘zbеkiston Rеspublikаsi Ichki ishlаr vаzirligi

Toshkent viloyatida tergov faoliyatini yanada takomillashtirish, uni sifat jihatidan yangi bosqichga olib chiqish, shuningdek, ichki ishlar va prokuratura organlarida faoliyat yuritayotgan tergov xodimlarining kasbiy bilim va koʻnikmalarini mustahkamlash maqsadida oʻquv-amaliy seminar tashkil etildi.

Mazkur seminar Oʻzbekiston Respublikasi Ichki ishlar vazirligi, Bosh prokuratura va Oliy sud hamkorligida oʻtkazildi. U Davlatimiz rahbarining oʻtgan yil 5-mart kuni Korrupsiyaga qarshi kurashish milliy kengashi yigʻilishida hamda joriy yil 27-yanvar kuni Toshkent shahrida xavfsiz muhitni shakllantirish boʻyicha ilgʻor tajribani joriy etish yuzasidan oʻtkazilgan videoselektor yigʻilishida belgilangan vazifalar ijrosini taʼminlashga qaratildi.

Tadbirda Ichki ishlar vaziri oʻrinbosari, polkovnik Ramazon Ashropov, Bosh prokurorning birinchi oʻrinbosari Bahriddin Valiyev, Oliy sud raisining birinchi oʻrinbosari Alisher Usmonov, shuningdek viloyat sudi sudyalari, Bosh prokuratura va Huquqni muhofaza qilish akademiyasi masʼul xodimlari, viloyat prokuraturasi tarmoq rahbarlari, tuman va shahar prokurorlarining sohaviy oʻrinbosarlari hamda tergovchilari, Ichki ishlar bosh boshqarmasi va uning quyi boʻlinmalari xodimlari, Iqtisodiy jinoyatlarga qarshi kurashish departamenti viloyat boshqarmasining tergovga masʼul rahbarlari, tergovchi va surishtiruvchilari, shuningdek ommaviy axborot vositalari vakillari ishtirok etdilar.

Tergov sifatini oshirishga qaratilgan oʻquv-amaliy seminar davomida tajribali mutaxassislar tomonidan jinoyat ishlarini sudda koʻrish jarayonida tergov va surishtiruv organlari tomonidan yoʻl qoʻyilayotgan kamchiliklar, raqamli kriminalistika imkoniyatlaridan foydalangan holda elektron dalillarni toʻplash va mustahkamlashning zamonaviy usullari, shuningdek axborot texnologiyalari orqali sodir etilgan jinoyatlarni (kiberjinoyatlar) fosh etishning oʻziga xos jihatlari yuzasidan maʼruzalar taqdim etildi.

Oʻzaro bahs-munozara ruhida oʻtgan tadbirda ishtirokchilar tomonidan berilgan savollarga mutaxassislar tomonidan atroflicha javoblar qaytarildi.

Shuningdek, Ichki ishlar vazirligi rahbariyati va boshqa masʼullar Toshkent viloyati prokuraturasida tergovchilarning nazariy va amaliy bilimlarini oshirish, kasbiy koʻnikmalarini shakllantirish maqsadida tashkil etilgan “Tergov poligoni” faoliyati bilan yaqindan tanishdilar.

Tergov poligonida jami 7 ta oʻquv xonalari tashkil etilgan boʻlib, ular qatoriga energiya resurslaridan noqonuniy foydalanish bilan bogʻliq jinoyatlarga bagʻishlangan oʻquv burchagi, yoʻl-transport hodisalari va virtual reallik xonasi, qotillik jinoyati, is gazidan zaharlanish va yongʻin sodir boʻlgan holatlar, shuningdek oʻzini osish holati boʻyicha hodisa joylarini modellashtiruvchi xonalar, hamda oʻqotar va sovuq qurollar bilan ishlashga ixtisoslashtirilgan xonalar kiradi.

Mazkur oʻquv xonalari tergovchilarning amaliy tajribasini oshirish, turli vaziyatlarni real sharoitga yaqin holda modellashtirish hamda ularning kasbiy koʻnikmalarini shakllantirishda muhim ahamiyat kasb etadi.

Shuningdek, bunday oʻquv-amaliy seminarlarni kelgusida ham tizimli ravishda tashkil etish orqali tergov faoliyati samaradorligini yanada oshirish, xodimlarning kasbiy mahoratini mustahkamlashga erishiladi.

IIV huzuridagi Tergov departamenti