Ichki ishlar vazirligi ishchi guruhining Surxondaryo viloyatidagi oʻrganishlari: "Poytaxt namunasi"ni hududlarda joriy etish, mahallalarda xavfsiz muhit yaratish, kriminogen vaziyat va aholi murojaatlarini oʻrganish eʼtibor markazida
2026-04-05 08:00:00 / Yangiliklar
Mamlakatimizda jamoat xavfsizligini taʼminlash va jinoyatchilikka qarshi kurashishning mutlaqo yangi tizimini joriy etish hamda Toshkent shahri misolida yoʻlga qoʻyilgan “poytaxt tajribasi”ni hududlarda tatbiq etilishini oʻrganish maqsadida Ichki ishlar vaziri general-leytenant Aziz Tashpulatov boshchiligidagi ishchi guruh tomonidan Surxondaryo viloyatida amalga oshirilayotgan ishlar joyiga chiqqan holda oʻrganildi.
Tadbir davomida Termiz shahar “Doʻstlik” mahallasi hududida “Xavfsiz shahar“ tamoyili asosida raqamlashtirish darajasini oshirishga qaratilgan zamonaviy Situatsion markazining qurilish jarayonlari bilan tanishildi. Markazda qurilish ishlarini jadallashtirish, maskanni ilmiy yondashuvlar asosida barcha talablarga mos holda barpo etish hamda unda zamonaviy axborot-kommunikatsiya texnologiyalarini keng joriy etish zarurligi taʼkidlandi.
Jarayonda, viloyatda axborot texnologiyalari sohasidagi jinoyatchilikka qarshi kurashish yoʻnalishida amalga oshirilayotgan ishlarning taqdimoti oʻtkazildi. Koʻrilgan choralar hamda aholi oʻrtasida olib borilgan keng koʻlamli targʻibot natijasida murojaatlar soni kamayib, ushbu turdagi jinoyatlarning soni oʻtgan oyning mos davriga nisbatan 21 foizga yaxshilangani eʼtirof etildi.
Jarqoʻrgʻon tumani “Yangi Oʻzbekiston” mahallasi hududiga tashrif davomida bunyodkorlik va obodonchilik ishlari bilan tanishildi. Mazkur manzilda, aholi soni tobora ortib borayotgani inobatga olinib, xavfsizlikni taʼminlash, fuqarolarning huquq va erkinlarini muhofaza qilish maqsadida, hududda Jarqoʻrgʻon tumani Ichki ishlar boʻlimining yangi maʼmuriy binosini qurilish loyihasi bilan tanishdi.
Loyiha taqdimoti jarayonida, qurilishi rejalashtirilgan IIB binosi barcha zamonaviy talablarga javob beradigan, xodimlar uchun qulay shart-sharoitlarni oʻzida mujassam etgan, aholiga sifatli xizmat koʻrsatishga, ularning qonuniy manfaatlarini taʼminlashga xizmat qiladigan maskan boʻlishi taʼkidlandi.
Shuningdek hududning Ichki ishlar boʻlinmasi rahbarlari va profilaktika inspektorlari bilan suhbat oʻtkazildi. Bunda tumanidagi mahallalarni jinoyatdan holi hududga aylantirish, profilaktika ishlarining samaradorligi hamda ichki ishlar organlari xodimlarining xizmat faoliyatini takomillashtirish hamda aholi bilan muloqotni yanada faollashtirish masalalariga alohida eʼtibor qaratildi.
Tadbir davomida Denov tumani Bahoriston mahallasida aholi gavjum boʻladigan Sayilgoh koʻchasida jamoat tartibini saqlash, fuqarolar xavfsizligini taʼminlash, hududda xavfsiz muhit yaratish borasida amalga oshirilayotgan ishlar koʻzdan kechirildi. Tuman hokimligi hamda huquqni muhofaza qiluvchi organ masʼullari tomonidan Denov tumanida jinoyatchilikning barvaqt oldini olishda kelgusida bajariladigan ishlari taqdimot qilindi.
Oʻrganishlar natijasiga koʻra, kriminogen vaziyati ogʻir hisoblangan hamda jinoyatchilikni salmogʻi oshgan Denov tumanida Ichki ishlar vaziri tomonidan viloyat hokimi Ulugʻbek Qosimov, hududiy hokimliklar va huquqni muhofaza qilish organlari hamda hamkor tashkilotlarning masʼullari ishtirokida videoselektor yigʻilishi oʻtkazildi.
Tadbirda joriy yilning birinchi chorak yakunlari tanqidiy tahlil qilinib, kelgusi davr uchun ustuvor vazifalar belgilab olindi.
Taʼkidlanganidek, jinoyatchilikning oldini olish borasida muayyan ishlar qilingan boʻlsa-da, ayrim yoʻnalishlarda oqsoqliklar koʻzga tashlanmoqda. Xususan, jinoyatchilik salmogʻi oshgan hamda kriminogen vaziyati ogʻir qolayotgan Termiz shahar, Jarqoʻrgʻon, Shoʻrchi hamda Denov tumanlarida vaziyatni yaxshilashga qaratilgan chora-tadbirlarni jadallashtirish, ogʻir hududlarga kuch vositalarni toʻgʻri taqsimlash, yoshlar va ayollar jinoyatchiligining oldini olish borasidagi masalalar tanqidiy muhokama etildi.
Yigʻilishda jinoyatchilikka qarshi kurashda faqat jazolash emas, balki uning ildizini bartaraf etishga alohida urgʻu berildi. Uyushmagan yoshlar bandligini taʼminlash, xotin-qizlar va bolalarga nisbatan zoʻravonlikning oldini olish, “qizil” toifadagi mahallalar bilan manzilli ishlash boʻyicha masʼullarga aniq topshiriqlar berildi.
Tadbir jarayonida xizmat faoliyatida yuqori natijalarga erishgan, aholi hamda safdoshlari tomonidan alohida eʼtirof etilgan 20 nafar xodimlar Ichki ishlar vazirining buyrugʻi bilan munosib ragʻbatlantirildi, jumladan uch nafariga muddatidan oldin maxsus unvonlar berildi.
Shuningdek, faoliyati davomida jiddiy kamchiliklarga yoʻl qoʻygan bir qator rahbar va xodimlarga nisbatan intizomiy taʼsir choralari koʻrildi.
Tadbir yakunida belgilangan vazifalarni tizimli va samarali amalga oshirishga qaratilgan chora-tadbirlar dasturini ishlab chiqish vazifasi yuklatildi.