O‘zbеkiston Rеspublikаsi Ichki ishlаr vаzirligi

Ichki ishlar vazirining birinchi oʻrinbosari Rustam Djurayev tomonidan Bosh prokurorning birinchi oʻrinbosari Baxriddin Valiyev rahbarligidagi ishchi guruh bilan birgalikda Oʻzbekiston Respublikasi Prezidentining 2026-yil 5-yanvardagi PQ-1 va PQ-2 sonli qarorlari ijrosini taʼminlash, mahallalarda xavfsiz muhitni shakllantirish hamda jinoyatchilikning barvaqt profilaktikasi samaradorligini oshirish maqsadida Toshkent viloyatining Angren va Olmaliq shaharlarida oʻrganishlar olib borildi.

Ishchi guruh tarkibida Milliy gvardiya, Kambagʻallikni qisqartirish va bandlik, Adliya, Maktabgacha va maktab taʼlimi, Sogʻliqni saqlash, oliy taʼlim, fan va innovatsiyalar vazirliklari, Oʻzbekiston mahallalar uyushmasi, Oila va xotin-qizlar qoʻmitasi hamda ularning hududiy boshqarmalari masʼul rahbarlari, huquq-tartibot idoralari taʼlim va ilmiy tashkilotlari rahbarlari, masʼul xodimlari, shuningdek boshqa mutasaddi idora va tashkilotlar rahbarlari ishtirok etdilar.

Oʻrganishlar davomida mahallalarda xavfsiz muhitni yaratish boʻyicha yaxlit manzilli ishlash tizimini joriy etish, shuningdek jinoyatchilikning barvaqt profilaktikasi samaradorligini yanada oshirishga qaratilgan vazifalar ijrosiga alohida ahamiyat berildi.

Jumladan, Angren shahrining “Ozodlik” va“Mustaqillik” mahallalarida voyaga yetmaganlar taʼminoti uchun alimentlarni toʻlash va undirish tizimi, shuningdek Oila va xotin-qizlar qoʻmitasining hududiy boʻlinmasi faoliyati oʻrganildi.

Profilaktik va probatsiya hisobida turgan shaxslar uchun tashkil etilgan aholini tibbiy koʻrikdan oʻtkazish jarayoni hamda “Boʻsh ish oʻrinlari yarmarkasi” faoliyati bilan tanishildi.

Muammoli oilalar bilan ishlash holati va firibgarlikning oldini olishga qaratilgan profilaktik tadbirlar samaradorligi atroflicha tahlil qilindi.

Ishchi safar davomida vazirning birinchi oʻrinbosari Angren shahri profilaktika, probatsiya va patrul-post xizmati faoliyati bilan tanishdi.

Respublikada har payshanba kuni oʻtkaziladigan“Yoshlar kuni” arafasida Departament rahbari “Ulugʻbek” mahallasida joylashgan “Yangi Angren” madaniy-sport majmuasiga tashrif buyurib, u yerda oʻtkazilayotgan sport musobaqalari va ijodiy tanlovlarda ishtirok etdi.

Ushbu tadbirlardan koʻzlangan maqsad yoshlar boʻsh vaqtini mazmunli tashkil etish va huquqbuzarliklarning oldini olishdan iborat ekanligi taʼkidlandi. Vazirning birinchi oʻrinbosari yoshlar bilan muloqot qilib, ularning yashash sharoiti, taʼlim olishi, sport, ijod, fan va sanʼat sohalarida oʻzini roʻyobga chiqarish imkoniyatlari bilan qiziqdi.

Shuningdek, Olmaliq shahrida soʻnggi uch yilda “qizilt toifa”da qolib kelayotgan 8 ta mahallalarda amalga oshirilgan ishlar oʻrganildi.

Jumladan, “Raqamli mahalla” platformasi orqali jinoyatchilik profilaktikasini tashkil etish, hududlarga oʻrnatilgan kuzatuv kameralarini yagona tizimga integratsiya qilish, shuningdek ijtimoiy profilaktika mexanizmlarining samaradorligi oʻrganildi.

Nizoli oilalar bilan ishlashda “Oilaviy qadriyatlarni mustahkamlash komissiyasi” faoliyatiga alohida eʼtibor qaratilib, uning amaliy natijalari muhokama qilindi.

“Ogʻir toifa”ga kiruvchi yoshlar bilan ishlash tizimi, xotin-qizlar oʻrtasida huquqbuzarliklarni oldini olish maqsadida tashkil etilgan oʻquv markazi faoliyati bilan tanishildi.

Olmaliq shahridagi “Kimyogar” mahallasida joylashgan “Yoshlar maskani”da probatsiya nazoratidagi shaxslar ishtirokida sayyor qabul oʻtkazildi. Unda 6 nafar shaxs jazoni muddatdan ilgari shartli ravishda ozod qilindi.

Yana 13 nafar fuqaroning turli ijtimoiy muammolari eshitilib, ularni hal etish boʻyicha tegishli masʼullarga aniq topshiriqlar berildi.

Shuningdek, ushbu mahallada “Yashil makon”umummilliy loyihasi doirasida ishchi guruh rahbarlari bilan birgalikda koʻchatlar ekildi

IIV Jamoat xavfsizligi departamenti Axborot xizmati