Oliy Majlis Senatining Mudofaa va xavfsizlik masalalari qoʻmitasi hamda Ichki ishlar vazirligi Akademiyasi oʻrtasida hamkorlik memorandumi imzolandi
2026-04-04 09:00:00 / Yangiliklar
Tadbirda qoʻmita raisi Qutbiddin Burxonov va akademiya boshligʻi Rustam Xatamov soʻzga chiqib, mazkur memorandum qonun ijodkorligi sifatini oshirish, parlament nazorati jarayonlarini ilmiy-uslubiy jihatdan qoʻllab-quvvatlash, huquqni qoʻllash amaliyotini takomillashtirishda muhim ahamiyat kasb etishini taʼkidlab oʻtdilar.
Shu kuni tomonlar jamiyatda qonun ustuvorligini mustahkamlash, ichki ishlar organlari faoliyatining ochiqligi va shaffofligini kuchaytirish, hududlarda aholi muammolarini oʻrganish, kriminogen vaziyatni barqarorlashtirish, huquqbuzarliklarning barvaqt oldini olish, qonunchilik jarayonlarini takomillashtirish, taʼlim sifatini oshirish va boshqa dolzarb yoʻnalishlarda hamkorlik qilishga kelishib oldilar.
Mazkur faoliyatni samarali tashkil etish uchun yetakchi ekspertlar, mutaxassislar va professor-oʻqituvchilar ishtirokida ishchi guruhlar tashkil etish, birgalikda tadqiqotlar va ekspertlik faoliyatini amalga oshirish, hamkorlik natijalarini muntazam ravishda tahlil va muhokama qilib borish mexanizmi yoʻlga qoʻyilishi aytib oʻtildi.
Bundan tashqari, hamkorlik memorandumi asosida 2026-2027-yillarda amalga oshirilishi belgilangan chora-tadbirlar boʻyicha “yoʻl xarita” ham imzolandi.
Tadbir yakunida ikki tomonlama hamkorlik parlament faoliyati samaradorligini oshirish bilan bir qatorda, “Oʻzbekiston — 2030” strategiyasida belgilab berilgan ustuvor maqsadlarni izchil hayotga tatbiq etishga xizmat qilishi qayd etildi.
IIV Akademiyasi Axborot xizmati