O‘zbеkiston Rеspublikаsi Ichki ishlаr vаzirligi

Qibray tumanida joylashgan Toshkent davlat agrar universitetida “Payshanba – yoshlar kuni” munosabati bilan keng qamrovli maʼnaviy-maʼrifiy, ilmiy va amaliy tadbirlar tashkil etildi. Tadbirlar doirasida “Rahbar va yoshlar” uchrashuvi, ochiq muloqotlar, innovatsion koʻrgazmalar hamda ekologik tashabbuslar amalga oshirildi.

Tadbirlarda talaba yoshlar hamda respublika davlat tashkilotlari rahbarlari, jumladan Oʻzbekiston Respublikasi Bosh prokurori oʻrinbosari Bahriddin Valiyev, Ichki ishlar vaziri oʻrinbosari, polkovnik Ramazon Ashropov, Qishloq xoʻjaligi vaziri Ibrohim Abdurahmonov, Oila va xotin-qizlarni qoʻllab-quvvatlash qoʻmitasi raisi oʻrinbosari Umida Abdullayeva, Oliy taʼlim, fan va innovatsiyalar vazirining birinchi oʻrinbosari Sardor Rajabov hamda universitet rektori Narzullo Oblomuradov ishtirok etdi.

Dastlab mehmonlar talaba-yoshlar oʻrtasida huquqbuzarliklarning oldini olish va jamoat tartibini taʼminlashda faol ishtirok etayotgan “Qalqon” jamoatchilik guruhi faoliyati bilan tanishdi. Unda yoshlarning huquqiy madaniyatini yuksaltirish, tartib-intizomni mustahkamlash borasidagi ishlar alohida eʼtirof etildi.

Shundan soʻng universitet hududida tashkil etilgan ilmiy va innovatsion ishlanmalar koʻrgazmasi namoyish etildi. Talabalar va yosh olimlar tomonidan yaratilgan agronomiya, ekologiya hamda asalarichilik yoʻnalishidagi startap loyihalar oʻzining amaliy ahamiyati bilan ajralib turdi.

Ochiq va samimiy muloqotlar jarayonida yoshlarni qiynayotgan muammolar, ularning taklif va tashabbuslari tinglanib, taʼlim sifatini oshirish, kasb-hunar egallash hamda zamonaviy koʻnikmalarni rivojlantirish yuzasidan muhim tavsiyalar berildi.

Xususan, xorijiy tillarni oʻrganish va global taʼlim imkoniyatlaridan samarali foydalanish masalalariga alohida eʼtibor qaratildi.

Tadbir doirasida madaniy-maʼrifiy dasturlar ham tashkil etilib, talaba-yoshlarning ijodiy ishlari, badiiy koʻrgazmalar va musiqiy chiqishlar namoyish etildi. “Oltin Qanot” guruhi aʼzolari hamda yosh ijodkorlar tomonidan yaratilgan asarlar ishtirokchilarda katta taassurot qoldirdi.

Shuningdek, ishtirokchilar universitetning zamonaviy “Renessans” maʼruzalar majmuasi hamda qishloq xoʻjaligi muzeyi bilan tanishib, agrar sohaning tarixiy rivoji va ilmiy yutuqlari haqida batafsil maʼlumotlarga ega boʻldi.

Amaliy tashabbuslar doirasida “Yashil makon” umummilliy loyihasi asosida universitet hududida daraxt ekish aksiyasi oʻtkazildi. Mazkur tashabbus yoshlar orasida ekologik madaniyatni yuksaltirish va atrof-muhitni asrashga xizmat qilmoqda.

Mazkur tadbirlar yoshlarga yaratilayotgan imkoniyatlarni kengaytirish, ularning bilim va salohiyatini roʻyobga chiqarish hamda faol fuqarolik pozitsiyasini shakllantirishga qaratilgani bilan ahamiyatlidir.

Toshkent viloyati IIBB Axborot xizmati