Sirdaryo viloyati IIBda qonuniylik va xizmat intizomini mustahkamlash masalalari tanqidiy muhokama qilindi
2026-04-03 18:20:00 / Yangiliklar
IIV tizimida qonuniylik va xizmat intizomini taʼminlash masalalariga bagʻishlangan navbatdagi yigʻilish Vazir oʻrinbosari polkovnik Diyorbek Sattarov rahbarligida Sirdaryo viloyati Ichki ishlar boshqarmasida oʻtkazilib, unda sohada toʻplanib qolgan kamchilik va muammolar tanqidiy-huquqiy jihatdan tahlil etildi.
Yigʻilishda qayd etilganidek, profilaktik tadbirlarning samaradorligi talab darajasida emasligi, jinoyatchilikka qarshi kurashishda tizimli yondashuvning yetishmasligi hamda ayrim rahbar xodimlarning xizmat majburiyatlarini bajarishga nisbatan loqayd munosabati amalda qonuniylik prinsiplarining buzilishiga olib kelayotgan omillar sifatida baholandi. Taʼkidlanishicha, bunday holatlar davlat organlari faoliyatining qonun ustuvorligi asosida yuritilishi shartligi toʻgʻrisidagi talablarga zid hisoblanadi.
Jumladan, joriy yil 2-aprel kuni ijtimoiy tarmoqlarda tarqalgan hamda jamoatchilikning haqli eʼtiroziga sabab boʻlgan holat — Sirdaryo viloyati IIB rahbar xodimi va uning yaqin qarindoshi ishtirokidagi huquqbuzarlik keskin muhokama qilindi. Ushbu holat xizmat vakolatlarini suiisteʼmol qilish va mansab mavqeidan shaxsiy manfaatlar yoʻlida foydalanish ehtimolini koʻrsatuvchi salbiy holat sifatida huquqiy baholandi.
Vazir oʻrinbosari Diyorbek Sattarov tomonidan huquqbuzarlikka yoʻl qoʻygan podpolkovnik Sherzod Pardayevning vazirlikning tegishli buyrugʻi bilan lavozimidan ozod etilgani misolida, xizmat intizomini buzgan shaxslarga nisbatan javobgarlik muqarrarligi prinsipi amalda taʼminlanishi shartligi alohida taʼkidlandi. Shuningdek, mansab va lavozimdan qatʼi nazar, xizmat intizomini buzgan har qanday xodimga nisbatan murosasiz choralar koʻrilishi davom ettirilishi qayd etildi.
Yigʻilish yakunida mavjud kamchiliklarni zudlik bilan bartaraf etish, xizmat intizomini mustahkamlash hamda qonuniylikni taʼminlash boʻyicha berilgan topshiriqlarning ijrosi ustidan taʼsirchan va tizimli nazorat oʻrnatish zarurligi yuzasidan rahbar xodimlarga aniq koʻrsatmalar berildi.