Mamlakatimizda xavfsizlikni taʼminlash boʻyicha yangi bosqich: Chilonzor tumanida “poytaxt namunasi” asosida amalga oshirilayotgan keng qamrovli choralar va amaliy natijalar tahlil qilindi
2026-04-04 08:25:00 / Yangiliklar
Ichki ishlar vaziri general-leytenant Aziz Tashpulatov tomonidan sohaviy xizmat rahbarlari, Chilonzor tuman hokimi, huquqni muhofaza qilish organlari hamda hamkor tashkilotlarning masʼullari ishtirokida Toshkent shahri Chilonzor tumanida xavfsiz muhitni shakllantirish va jamoat xavfsizligini ishonchli taʼminlash masalalari boʻyicha oʻrganish olib borildi.
Tadbirda Oʻzbekiston Respublikasi Prezidenti tomonidan Toshkent shahrida oʻtkazilgan tanqidiy selektor yigʻilishida belgilangan vazifalar ijrosi, jumladan, uyushgan jinoyatchilik, narkojinoyatlar, kiberjinoyatchilik va yashirin iqtisodiyotga qarshi kurashish boʻyicha “poytaxt namunasi”ni Chilonzor tumanida joriy etish masalalari oʻrganildi.
Xususan, maktablarda xavfsiz muhit yaratish, hududga kirish-chiqishni qatʼiy nazorat qilish, videokuzatuv tizimlarini joriy etish, ichki xavfsizlik qoidalariga rioya etilishini oʻrganish maqsadida tumanning “Bogʻzor” mahallasida joylashgan 179-sonli umumtaʼlim maktabi, “Yakkatut” mahallasidagi 202-sonli umumtaʼlim maktabi hamda “Botirma” mahallasida joylashgan “Lumos” xususiy maktablarning faoliyati oʻrganildi.
Bunda, oʻquvchilar oʻrtasida bulling va zoʻravonlikning oldini olish, psixologik xizmatlarni kuchaytirish hamda xavfsizlik qoidalari boʻyicha muntazam tushuntirish ishlarini olib borish zarurligi taʼkidlandi.
Bundan tashqari, maktablarda malakali qoʻriqchilarni jalb qilish, kiruvchilarni roʻyxatga olish tizimini yoʻlga qoʻyish va hududni toʻliq himoya qilish choralari koʻrilishi, favqulodda holatlarga tayyorgarlik doirasida yongʻin xavfsizligi vositalari bilan taʼminlash, evakuatsiya rejalarini ishlab chiqish va amaliy mashgʻulotlar oʻtkazish boʻyicha tegishli topshiriqlar berildi.
Oʻrganishlar davomida Chilonzor buyum savdo kompleksida “Raqamli va xavfsiz bozor” tamoyili asosida amalga oshirilayotgan chora-tadbirlar bilan tanishildi. Xususan, bozorga xizmat koʻrsatuvchi Ichki ishlar boʻlimi binosida tashkil etilgan tezkor boshqaruv markazi faoliyatining taqdimoti oʻtkazildi. Bu jarayonda, savdo rastalari va narxlarni monitoring qilish, soliqdan boʻyin tovlash va noqonuniy yigʻimlarning oldini olishga xizmat qiluvchi “elektron billing tizimi” va sunʼiy intellekt kameralari joriy etilmoqda.
Chilonzor tumanidagi mahallalarda jinoyatchilikning oldini olish, ularni jinoyatdan holi hududga aylantirish, profilaktika ishlarini kuchaytirish va aholi bilan muloqotni yanada faollashtirish masalalariga alohida eʼtibor qaratildi, shuningdek, “Xavfsiz va sogʻlom yurt” tezkor-profilaktik tadbirlari doirasida olib borilgan chora-tadbirlar, profilaktika ishlarining samaradorligi hamda ichki ishlar organlari xodimlarining xizmat faoliyati koʻrib chiqildi.
Shuningdek, ijtimoiy-kriminogen vaziyat barqarorligini taʼminlashda mahalla faollari bilan oʻzaro hamkorlikda amalga oshirilayotgan ishlar ahvoli bilan tanishish maqsadida kriminogen vaziyati ogʻir hisoblangan mahallalarda profilaktik tadbirlarni kuchaytirish vazifalari belgilandi.
Taʼkidlanganidek, Chilonzor tumani tajribasi boʻyicha amalga oshirilayotgan tizimli ishlar mamlakatimizning boshqa hududlarida ham izchil davom ettiriladi.