Yoshlar kuni munosabati bilan IIV akademiyasida “Rahbar va yoshlar” uchrashuvi boʻlib oʻtdi
2026-04-03 07:25:00 / Yangiliklar
Ichki ishlar vazirligi departament boshligʻi oʻrinbosari, Maʼnaviy-maʼrifiy ishlar xizmati rahbari Sohibjamol Joldasova va uning xotin-qizlar masalalari boʻyicha oʻrinbosari Nargiza Mirjalolova akademiyada faoliyat yuritayotgan ayol xodimalar va taʼlim olayotgan kursant qizlar bilan uchrashdi.
Uchrashuvda yurtimiz xotin-qizlari uchun yaratilayotgan keng imkoniyatlar eʼtirof etildi. Yangi Oʻzbekistonda xotin-qizlarning oʻrni va nufuzi tobora yuksalib borayotgani, buning samarasida ayollar barcha sohalar qatori ichki ishlar organlari tizimida ham samarali mehnat qilayotgani aytib oʻtildi.
“Ayollarimizni har tomonlama qoʻllab-quvvatlash, iqtidor va salohiyatini roʻyobga chiqarish, ayniqsa kursant qizlarimizni bilimli, fidoyi, vatanparvar insonlar etib tarbiyalash ustuvor vazifalarimiz sanaladi. Prezidentimiz bitta qizni oʻqitsak, butun oilani oʻqitgan boʻlamiz, deya bejiz aytmaganlar”, — dedi Sohibjamol Joldasova.
Ochiq va samimiy muloqot ruhida oʻtgan tadbirda vazirlik masʼul xodimi yigʻilganlarning taklif va muammolarini tingladi. Yoshlar qatlami mamlakatimiz taraqqiyotining muhim tayanchi ekanligini taʼkidlab, xotin-qizlarni har tomonlama faol boʻlishga, zamonaviy sharoit va imkoniyatlardan unumli foydalanishga, mamlakatimiz ravnaqiga munosib hissa qoʻshishga chorladi.
Tadbirda soʻz chiqqanlar tomonidan bildirilgan har bir murojaat va tashabbus qoʻllab-quvvatlandi. Kursant qizlar oʻzlarini qiziqtirgan masalalar yuzasidan maslahat va tavsiyalar oldi. Bir guruh faollar vazirlik rahbariyatining tashakkurnoma va esdalik sovgʻalari bilan ragʻbatlantirildi.
IIV akademiyasi Axborot xizmati