O‘zbеkiston Rеspublikаsi Ichki ishlаr vаzirligi

Tadbirda davlatimiz rahbarining mahallalarda xavfsiz muhitni yaratish yoʻnalishida yaxlit manzilli ishlash toʻgʻrisidagi qarori bilan hududlarga biriktirilgan masʼul rahbarlar, IIV akademiyasi vakillari hamda “mahalla yettiligi” tizimi xodimlari qatnashdi.

Seminar-trening avvalida akademiya boshligʻi Rustam Xatamov soʻzga chiqib, Prezidentimiz qarorining dolzarb ahamiyati, ustuvor yoʻnalishlari, qaror doirasida amalga oshirilayotgan izchil chora-tadbirlar, hududlarda islohotlar samarasini taʼminlash va aholi muammolarini hal etishda “mahalla yettiligi”ning oʻrni, tizimning faoliyat samaradorligini oshirish masalalariga atroflicha toʻxtaldi.

Hamkor idoralar bilan birgalikda tashkil etilayotgan mashgʻulotlar “yettilik” vakillarining kasbiy kompetentligini oshirish orqali mahallalarning davlat organlari bilan aholi oʻrtasida ishonchli koʻprik sifatidagi rolini yanada mustahkamlashga qaratilganini alohida taʼkidladi.

Shundan soʻng taʼlim muassasasi professor-oʻqituvchilari tomonidan “Mahalla yettiligi” tizimining huquqiy asoslari», “Ijtimoiy profilaktika obyektlarini aniqlash usullari”, “Ijtimoiy moslashtirish dasturlari natijadorligini oshirish”, “Ijtimoiy profilaktika haftaligi”ning maqsad va vazifalari», “Huquqbuzarliklar profilaktikasiga keng jamoatchilikni jalb qilish” kabi dolzarb mavzularda interfaol mashgʻulotlar oʻtkazildi.

Seminar-trening yakunida ochiq muloqot tashkil qilinib, mahallalardagi muammolar va ularni bartaraf etish yuzasidan fikr almashildi.

Shu kuni akademiya boshligʻi “Nur” mahallasiga borib, aholi uchun xavfsiz muhit yaratish va huquqbuzarliklarning barvaqt oldini olish borasida amalga oshirilayotgan ishlar ahvolini oʻrgandi. Mahalla faollari va biriktirilgan masʼullar bilan muloqot qilib, “yoʻl xarita”da belgilangan chora-tadbirlar ijrosini muhokama qildi.

Qayd etilishicha, mahallaga akademiyaning tajribali professor-oʻqituvchilaridan iborat ishchi guruh jalb qilingan. Oʻrganishlar davomida kriminogen vaziyatga salbiy taʼsir koʻrsatayotgan omillar ilmiy-amaliy yondashuvlar asosida tahlil qilinib, tegishli taklif va tavsiyalar ishlab chiqildi.

Shunga koʻra, jinoyat sodir etilishi mumkin boʻlgan joylarga tashvish tugmalari va zamonaviy kameralar oʻrnatilib, xavfsizlik tizimlariga integratsiya qilindi. Koʻchalar yoritish chiroqlari bilan jihozlanib, jamoat tartibini taʼminlash uchun qoʻshimcha kuch va vositalar yoʻnaltirildi. Xonadonlarni manzilli oʻrganish davomida aniqlangan ijtimoiy profilaktika obyektlari bilan tegishli profilaktik chora-tadbirlar belgilab olindi.

Muhimi, huquqbuzarliklarning barvaqt oldini olishga qaratilgan tizimli ishlar natijasida mahallaning kriminogen vaziyati barqarorlashdi.

Akademiya boshligʻi hudud faollari bilan muloqot chogʻida mahallani “yashil” toifaga oʻtkazish, bunga toʻsiq boʻlayotgan omillarga butunlay barham berish, aholi muammolarini muntazam oʻrganib borish, ijtimoiy profilaktika samaradorligini oshirish, faoliyatni yanada jadallashtirish zarurligini aytib oʻtdi. Kelgusida bajarilishi lozim boʻlgan chora-tadbirlar boʻyicha aniq vazifalarni belgilab berdi.

IIV Akademiyasi Axborot xizmati