Ichki ishlar vazirligi hamda uning hududiy boʻlinmalari tomonidan tashkil etilgan sayyor qabullar davomida fuqarolarning murojaatlari batafsil oʻrganilib, mavjud muammolarni tizimli bartaraf etishga qaratilgan aniq vazifalar belgilanmoqda
2026-03-30 08:00:00 / Yangiliklar
Yurtboshimiz tomonidan ilgari surilgan muhim yoʻnalishlardan biri sifatida aholi bilan ochiq, samarali va doimiy muloqotni taʼminlash masalasi alohida eʼtiborga olinmoqda.
Shu maqsadda ichki ishlar organlari tomonidan fuqarolar bilan bevosita aloqani kuchaytirish, ularning murojaat va ehtiyojlarini chuqur tahlil qilish, kelib tushayotgan ariza va takliflarni amaldagi qonunlarga muvofiq oʻz vaqtida koʻrib chiqish hamda tegishli choralarni belgilash boʻyicha izchil ishlar olib borilmoqda.
Joriy yilning 29-mart kuni Ichki ishlar vaziri general-leytenant Aziz Tashpulatov rahbarligida, masʼul mutasaddilar ishtirokida aholi uchun navbatdagi sayyor qabul tashkil etildi. Qabul jarayonida aholiga qulay sharoit yaratish maqsadida, ob-havo hamda masofaviy omillar inobatga olindi. Xususan, Toshkent shahri va viloyati fuqarolari bilan yuzma-yuz muloqot oʻtkazilgan boʻlsa, Qoraqalpogʻiston Respublikasi va boshqa hududlarda yashovchilar uchun qabullar videokonferensiya orqali masofadan turib tashkil etildi.
Ushbu tadbir davomida jami 521 ta murojaat qayd etildi. Ularning aksariyati fuqarolar oʻrtasidagi moliyaviy munosabatlar, yoʻl harakati xavfsizligi, surishtiruv va dastlabki tergov jarayonlari, shuningdek, kadrlar bilan ishlash masalalariga oid muammolarni qamrab oldi.
Kelib tushgan murojaatlarning 250 tasi, yaʼni 48 foizi qonunchilik asosida joyida ijobiy hal qilindi. Qolgan 271 ta murojaat boʻyicha esa qoʻshimcha oʻrganish talab etilgani sababli, ular nazoratga olinib, masʼul idoralar hamkorligida koʻrib chiqish uchun tegishli topshiriqlar berildi.
Shu bilan birga, Qoraqalpogʻiston Respublikasi, Toshkent shahri va viloyati, shuningdek, boshqa hududlardagi ichki ishlar organlari rahbarlari tomonidan oʻtkazilgan qabullarda jami 475 ta murojaat qabul qilindi. Ularning 185 tasi, yaʼni 39 foizi joyidayoq ijobiy yechim topgan boʻlsa, 290 tasi qoʻshimcha tekshiruv asosida koʻrib chiqish uchun yoʻnaltirildi.
Sayyor qabullar davomida aholini tashvishga solayotgan masalalar, huquqiy muammolar va ularni bartaraf etish yoʻllari atroflicha muhokama qilinib, fuqarolarga tegishli tushuntirishlar berildi.
Ushbu tadbirlar tizimli ravishda mamlakatimizning barcha hududlarida davom ettirilmoqda.