Respublika idoralararo muvofiqlashtirish shtabi tomonidan Sirdaryo viloyatida Prezident qarorlari ijrosini taʼminlash yuzasidan tizimli ishlar amalga oshirilmoqda
2026-03-29 09:00:00 / Yangiliklar
Bosh prokurorning birinchi oʻrinbosari B.Valiyev rahbarligida Oʻzbekiston Respublikasi Prezidentining 2026-yil 5-yanvardagi PQ–1 va PQ–2-son qarorlari ijrosini taʼminlash maqsadida Sirdaryo viloyatida Respublika idoralararo muvofiqlashtirish shtabi tashkiliy yigʻilishi boʻlib oʻtdi.
Unda vazirlik va idoralar, huquq-tartibot organlari, taʼlim va ilmiy muassasalar rahbarlari hamda tegishli ishchi guruh aʼzolari ishtirok etib, mahallalarda xavfsiz muhit yaratish, jinoyatchilikning barvaqt profilaktikasini kuchaytirish va manzilli ishlash tizimini samarali joriy etishga qaratilgan ustuvor vazifalar belgilab olindi.
Shu bilan birga, ishchi guruh tomonidan joylarda amaliy oʻrganishlar olib borilib, xususan Guliston shahrida xotin-qizlar muammolarini hal etishga qaratilgan sayyor qabullarda ishtirok etildi.
Unda ogʻir ahvolga tushib qolgan xotin-qizlarni ijtimoiy qoʻllab-quvvatlash, oilalarni tiklash, oilaviy qadriyatlarni mustahkamlash borasida amalga oshirilayotgan ishlar tahlil qilinib, mavjud kamchiliklar va muammolar oʻrganildi.
Shuningdek, “Taraqqiyot” mahallasi misolida jinoyat sodir etgan ayollar bilan ishlash, “Oila pasporti” tizimi va koʻchma huquqiy maslahat xizmatlari faoliyati koʻrib chiqilib, notinch oilalarni qayta shakllantirish, ularni ijtimoiy hayotga moslashtirish va bandligini taʼminlash yuzasidan aniq topshiriqlar berildi.
Bundan tashqari, Sirdaryo viloyati prokuraturasida oʻquv-amaliy seminar tashkil etilib, unda Respublika idoralararo muvofiqlashtirish shtabi aʼzolari, hududiy rahbarlar va mutaxassislar ishtirok etdi.
Seminar davomida “Sirdaryo tajribasi” asosida ishlarni tashkil etish, oilaviy nizolarni mediatsiya orqali hal qilish, xotin-qizlarga nisbatan tazyiq va zoʻravonliklarning oldini olish, yoshlar bilan manzilli ishlash hamda zamonaviy oʻqitish platformalarini joriy etish masalalari atroflicha muhokama qilindi.
Yigʻilish va oʻrganishlar yakunida masʼullarga jinoyatlarning barvaqt oldini olish, profilaktik tadbirlarni kuchaytirish va belgilangan vazifalar ijrosini samarali taʼminlash yuzasidan aniq koʻrsatma va topshiriqlar berildi.
Respublika idoralararo muvofiqlashtirish shtabining Sirdaryo viloyatidagi oʻrganishlari davom etmoqda.
Sirdaryo viloyati IIB Axborot xizmati