IIV rahbariyati tomonidan Toshkent shahri Mirobod tumanidagi “Ming oʻrik” hamda “Movarounnahr” MFYda oʻrganishlar olib borildi
2026-03-28 15:05:00 / Yangiliklar
Ichki ishlar tizimida olib borilayotgan islohotlar doirasida joylardagi holatni oʻrganish, aholi bilan ochiq muloqot qilish va muammolarni joyida hal etishga alohida eʼtibor qaratilmoqda. Ana shunday amaliy safarlardan biri doirasida vazir oʻrinbosari general-mayor Baxodir Mirzaraximov tomonidan Mirobod tumanidagi mahallalarda oʻrganish ishlari amalga oshirildi.
Jumladan, tuman hududida joylashgan Ming oʻrik MFY hamda Movarounnahr MFYdagi ijtimoiy-huquqiy muhit, jamoat xavfsizligini taʼminlash borasida amalga oshirilayotgan ishlar atroflicha koʻrib chiqildi. Safar davomida mahalla raislari, profilaktika inspektorlari hamda keng jamoatchilik vakillari bilan uchrashuvlar oʻtkazildi.
Oʻrganishlar jarayonida, avvalo, huquqbuzarliklarning oldini olish, ayniqsa yoshlar oʻrtasida jinoyatchilikni kamaytirish, oilalardagi ijtimoiy muammolarni barvaqt aniqlash va bartaraf etish masalalariga urgʻu berildi. Shuningdek, har bir xonadon kesimida manzilli ishlash, “temir daftar”, “yoshlar daftari” va “ayollar daftari” orqali ehtiyojmand aholi qatlamiga amaliy yordam koʻrsatish holati tahlil qilindi.
Mahallalarda jamoat tartibini saqlash, tungi vaqtda xavfsizlikni taʼminlash, videokuzatuv vositalaridan samarali foydalanish, profilaktika tadbirlarini kuchaytirish boʻyicha mavjud kamchiliklar ham koʻrsatib oʻtildi. Masʼul rahbarlarga aniq vazifalar yuklatilib, ularning ijrosini taʼminlash yuzasidan tegishli topshiriqlar berildi.
Shuningdek, aholi bilan muloqot chogʻida fuqarolarni qiynayotgan masalalar tinglanib, ularni hal etish boʻyicha tegishli idoralar bilan hamkorlikda amaliy choralar belgilab olindi. Bu kabi uchrashuvlar aholining davlat organlariga boʻlgan ishonchini yanada mustahkamlashga xizmat qilayotgani taʼkidlandi.
Umuman olganda, mazkur oʻrganishlar hududlarda tinchlik va osoyishtalikni taʼminlash, huquqbuzarliklarning oldini olish va aholi farovonligini oshirishga qaratilgan ishlarni yangi bosqichga olib chiqishga xizmat qiladi.
IIV Transport va turizm obyektlarida xavfsizlikni taʼminlash Departamenti Axborot guruhi