IIV akademiyasida “Oʻqotar qurollar va uning oʻq-dorilari noqonuniy muomalasiga qarshi kurashish: milliy va xalqaro tajriba, raqamli texnologiyalar va zamonaviy xavf-xatarlar” mavzuida milliy seminar boʻlib oʻtdi
2026-03-27 08:45:00 / Yangiliklar
Prezident Administratsiyasi huzuridagi Narkotiklar va oʻqotar qurollarni nazorat qilish agentligi tashabbusi bilan tashkil etilgan tadbirda nufuzli xalqaro tashkilotlar, manfaatdor vazirlik va idoralar vakillari, soha mutaxassislari, ekspert va olimlar qatnashdi.
Tadbir avvalida IIV akademiyasi boshligʻi Rustam Xatamov soʻz olib, milliy seminarning ustuvor maqsadi va dolzarb ahamiyatiga toʻxtaldi. Bugungi kunda qurol-yarogʻlarning noqonuniy aylanmasi bilan bogʻliq transmilliy jinoyatlar koʻlami ortib borayotgani, anjuman global muammoga qarshi samarali yondashuvlarni ishlab chiqish va saʼy-harakatlarni birlashtirishda muhim platforma boʻlishini taʼkidladi.
Milliy seminar ochilishida, shuningdek Narkotiklar va oʻqotar qurollarni nazorat qilish agentligi direktori oʻrinbosari Jobir Azimov, BMT Narkotiklar va jinoyatchilik boʻyicha boshqarmasi mintaqaviy vakili oʻrinbosari Aleksandr Fedulov, YeXHTning Oʻzbekistondagi loyihalari muvofiqlashtiruvchisi Antti Karttunen chiqish qildi.
Anjumanda noqonuniy qurol-yarogʻ savdosi bilan bogʻliq jahondagi vaziyat, ushbu turdagi transmilliy jinoyatlarning zamonaviy koʻrinishlari, oʻqotar qurollar va oʻq-dorilarning noqonuniy aylanmasiga qarshi kurashish mexanizmlari hamda qonunchilik asoslarini takomillashtirish, huquqni muhofaza qiluvchi tuzilmalar faoliyatiga ilgʻor yondashuvlarni tatbiq etish masalalari, bu borada xalqaro tajribaning oʻziga xos jihatlari, mavjud muammolar va ularning yechimlari atroflicha muhokama qilindi.
Maʼruza va chiqishlar yakunida oʻqotar qurollar hamda oʻq-dorilarning noqonuniy muomalasiga qarshi kurashishda hamkorlikni mustahkamlash, kompleks yondashuv va chora-tadbirlarni amaliyotga tatbiq qilish, davlatlar va xalqaro tashkilotlar oʻrtasida ilgʻor tajribalarni almashishga qaratilgan tavsiyalar bildirildi.
Milliy seminar doirasida ishtirokchilar uchun maxsus koʻrgazma ham tashkil etildi.
IIV akademiyasi Axborot xizmati