Voleybol boʻyicha erkaklar oʻrtasidagi Oʻzbekiston chempionatining qizgʻin bahslari davom etmoqda
2026-03-26 09:00:00 / Yangiliklar
Buxoro shahrida voleybol boʻyicha erkaklar oʻrtasida Oʻzbekiston chempionati oliy ligasining 3-tur bellashuvlari koʻtarinki ruhda davom etmoqda. 22-mart kuni start olgan ushbu nufuzli musobaqa 1-aprelga qadar davom etishi rejalashtirilgan.
Musobaqaning 3-kuni, yaʼni 25-mart sanasida “BuxDU” sport zalida boʻlib oʻtgan oʻyinlar haqiqiy sportga xos shiddat va murosasiz kurashlarga boy boʻldi. Quyida ushbu kundagi erkaklar oʻrtasidagi uchrashuvlar natijalari bilan tanishishingiz mumkin:
Toshkent viloyatining “AGMK” hamda Xorazm viloyatining “UrDU” jamoalari oʻrtasidagi bahsda “AGMK” vakillari oʻz ustunligini koʻrsatib, 3:0 hisobida ishonchli gʻalabaga erishdi.
Fargʻona viloyatining “FarDU” jamoasi Navoiy viloyatining “Sugʻdiyona-Konchi” yigitlariga qarshi maydonga tushdi. Qiziqarli oʻtgan bahsda navoiyliklar raqibga hech qanday imkoniyat qoldirmadi va 3:0 hisobida yirik gʻalabani qoʻlga kiritdi.
Qoraqalpogʻiston Respublikasining “QDU” hamda Toshkent shahrining “Uztelekom” jamoalari oʻrtasidagi uchrashuvda poytaxtliklar oʻz mahoratlarini koʻrsatib, 3:0 hisobida zafar quchdi.
Samarqand viloyatining “SamDPI” hamda Buxoro viloyatining “BuxDU” jamoalari oʻyinida mezbonlar – buxorolik yigitlar juda faol va chiroyli oʻyin namoyish etib, 3:0 hisobida gʻolib boʻlishdi.
Buxoro viloyati IIB Axborot xizmati