Ichki ishlar vaziri general-leytenant Aziz Tashpulatov tomonidan IIV Qorovul qoʻshinlari tasarrufidagi harbiy qismda shaxsiy tarkibning jangovar shayligi va xizmat faoliyatining samaradorligi oʻrganildi
2026-03-25 21:30:00 / Yangiliklar
Oʻzbekiston Respublikasi Ichki ishlar vaziri general-leytenant Aziz Tashpulatov tomonidan IIV Qorovul qoʻshinlariga qarashli 7535-harbiy qism 2-batalyoni faoliyati, harbiy qismning maxsus vazifalarni bajaruvchi safarbarlik vzvodining jangovar shayligi tekshirildi.
Tekshiruv jarayonida shaxsiy tarkibning tayyorgarlik darajasi, texnik va taktik imkoniyatlari, shuningdek, favqulodda vaziyatlarda tezkor harakatlanish uquvlariga alohida eʼtibor qaratildi. Aniqlangan holatlar tahlil qilinib, kelgusida jangovar shaylik salohiyatini yanada oshirishga qaratilgan amaliy taklif va tavsiyalar berildi.
Oʻrganish jarayonida harbiy qism infratuzilmasi, yaratilgan shart-sharoitlar, harbiy qismga biriktirilgan harbiy va maxsus texnika holati, askarlar oshxonasi, maʼnaviyat va maʼrifat markazi hamda sport mashgʻulotlari koʻzdan kechirildi. Ushbu yoʻnalishlarda amalga oshirilayotgan ishlar tahlil qilinib, mavjud imkoniyatlarni yanada takomillashtirish yuzasidan aniq vazifalar belgilab berildi.
Shu bilan birga, harbiy qismning jangovar shayligini yanada mustahkamlash, shaxsiy tarkibning kasbiy tayyorgarligini oshirish hamda xizmatni tashkil etish samaradorligini oshirish maqsadida rejadan tashqari taktik-saf mashgʻulotlarini oʻtkazish zarurati belgilandi.
Ushbu tekshiruvlar mamlakatimizning boshqa hududlarida ham oʻtkazib boriladi.