Sirdaryoda xavfsizlik va xizmat samaradorligiga qaratilgan oʻrganishlar: strategik obyektlar va hududiy boʻlinmalar faoliyati tahlil qilindi
2026-03-24 16:30:00 / Yangiliklar
Dastlab, Sirdaryo viloyati Ichki ishlar boshqarmasi boshligʻi Shirin shahrida joylashgan ACWA Power kompaniyasiga qarashli yangi elektr energiya ishlab chiqarish stansiyasida boʻldi.
Tashrif davomida boshqarma boshligʻi mazkur strategik ahamiyatga ega obyektda xavfsizlikni taʼminlash holati, qoʻriqlash xizmati faoliyati hamda xodimlar uchun yaratilgan shart-sharoitlar bilan yaqindan tanishdi. Ayniqsa, obyekt hududida jamoat tartibini saqlash, texnikaviy xavfsizlik talablariga rioya etish, shuningdek, zamonaviy nazorat tizimlarining joriy etilgani alohida koʻzdan kechirildi.
Shu bilan birga, qoʻriqlash xizmati xodimlarining xizmat oʻtash sharoitlari, ularning moddiy-texnika taʼminoti, xizmatni samarali tashkil etish boʻyicha amalga oshirilayotgan ishlar tahlil qilindi. Masʼullarga xavfsizlikni yanada kuchaytirish, har qanday favqulodda holatlarning oldini olish hamda hududda barqaror tinchlikni taʼminlash yuzasidan tegishli koʻrsatmalar berildi.
Tashrifning keyingi manzili Boyovut tumani Ichki ishlar boʻlimi boʻldi.
U yerda Sirdaryo viloyati Ichki ishlar boshqarmasi boshligʻi boʻlimda xizmat olib borayotgan shaxsiy tarkib uchun yaratilgan shart-sharoitlar, xizmat xonalari, moddiy-texnika bazasi hamda hudud tozaligi bilan yaqindan tanishdi.
Shuningdek, xodimlarning xizmat samaradorligini oshirish, ular uchun munosib ish muhitini yaratish, xizmat intizomi va ichki tartibga rioya etish masalalari atroflicha koʻrib chiqildi. Boʻlim hududida olib borilayotgan obodonlashtirish ishlari, sanitariya holati ham alohida eʼtibor markazida boʻldi.
Boshqarma boshligʻi tomonidan shaxsiy tarkib bilan muloqot oʻtkazilib, ularning fikr va takliflari tinglandi. Mavjud kamchiliklarni bartaraf etish, xizmatni yanada samarali tashkil etish hamda aholi xavfsizligini taʼminlash borasida aniq vazifalar belgilab berildi.
Taʼkidlanganidek, har bir hududda xizmat olib borayotgan xodimlar uchun munosib shart-sharoit yaratish, ularning masʼuliyati va faoliyatiga ijobiy taʼsir koʻrsatadi.
Sirdaryo viloyati IIB Axborot xizmati