O‘zbеkiston Rеspublikаsi Ichki ishlаr vаzirligi

Shu munosabat bilan akademiya boshligʻi Rustam Xatamov Turkiya, Vengriya, Saudiya Arabistoni, Maldiv va Moʻgʻuliston davlatlaridan kelgan delegatsiya aʼzolarini qabul qildi.

Uchrashuvda tashkilotga aʼzo taʼlim muassasalari oʻrtasidagi hamkorlikning amaliy natijalari va istiqbollari haqida soʻz bordi. Akademiya boshligʻi jahon geosiyosiy maydonida global tendensiyalar oʻzgarayotgan hozirgi murakkab sharoitda koʻp qirrali aloqalarni yanada kengaytirish tomonlar manfaatiga xizmat qilishini alohida taʼkidladi. Bu borada INTERPA taʼlim integratsiyasini kuchaytirish va yangi bosqichga olib chiqishda muhim platformaga aylanib borayotgani, galdagi oʻquv kursi professor-oʻqituvchilarning kasbiy salohiyatini oshirish, ilgʻor tajribalarni oʻrganish va amaliyotga joriy etishda dolzarb ahamiyat kasb etishini aytib oʻtdi.

Shu kuni mehmonlar akademiya faoliyatini oʻrganish maqsadida Axborot-resurs markazi, Magistratura oʻquv binosi, Xorijiy kadrlar bilan ishlash fakulteti, Taʼlim sifatini monitoring va nazorat qilish markazi, Maʼnaviyat va maʼrifat markazi, sport majmuasi hamda boshqa maskanlarda boʻlishdi. Dual taʼlim imkoniyatlarini kengaytirish maqsadida yoʻlga qoʻyilgan oʻquv tezkor-tergov guruhlari hamda kriminalistik laboratoriyalar uchun moʻljallangan maxsus transport vositalarini koʻzdan kechirishdi.

Taʼlim jarayonidagi keng qamrovli islohotlar, amaliyotga joriy qilingan ilgʻor yondashuvlar, professor-oʻqituvchilar va tinglovchi-kursantlar uchun yaratilgan zamonaviy sharoitlar xorijiy davlatlar vakillarida katta qiziqish uygʻotdi. Shu bilan birga, mehmonlar buyuk ajdodlarimizning boy ilmiy-maʼnaviy merosi asosida yosh avlodni yuksak vatanparvarlik ruhida tarbiyalash borasida olib borilayotgan ishlarni alohida eʼtirof etishdi.

Aytish joizki, 27-mart kuniga qadar davom etadigan oʻquv kursi doirasida tajribali professor-oʻqituvchilar tomonidan dolzarb mavzularga bagʻishlangan mashgʻulotlar oʻtkaziladi.

IIV Akademiyasi Axborot xizmati