Oʻzbekiston Respublikasi Ichki ishlar vaziri general-leytenant Aziz Tashpulatovning Navroʻz – umumxalq bayrami munosabati bilan tabrigi
2026-03-01 05:00:00 / Yangiliklar
Ichki ishlar organlari xodimlari va harbiy xizmatchilari, soha faxriylari hamda xizmat burchini bajarish vaqtida halok boʻlgan xodimlarning oila aʼzolarini 21-mart – Navroʻz umumxalq bayrami bilan samimiy muborakbod etaman.
Navroʻzi olam xalqimizning qadimiy va bebaho qadriyatlaridan biri boʻlib, qariyb uch ming yillik boy tarixga ega. Navroʻz – inson va tabiat uygʻunligini asrab-avaylashga, tinchlik, doʻstlik hamda hamjihatlik kabi umuminsoniy qadriyatlarni ulugʻlashga daʼvat etadigan yangilanish va yasharish ayyomi sifatida qalblarga iliqlik bagʻishlaydi.
Xalqimizning ezgu orzu-intilishlari, bagʻrikenglik, mehr-oqibat va hamjihatlik kabi yuksak insoniy fazilatlarini oʻzida mujassam etgan ushbu ayyomning bu yil Ramazon hayiti bilan bir vaqtda kelishida oʻziga xos ramziy maʼno mujassam.
Muhtaram Prezidentimiz Shavkat Miromonovich Mirziyoyev: “Navroʻz azaldan xalqimizning milliy va umumbashariy qadriyatlarga, dunyoviy davlat tamoyillariga, bagʻrikenglik, chin doʻstlik va hamkorlik gʻoyalariga sodiqligining yaqqol ramzidir.
Bu ayyom yurtimizdagi barcha millat va elat vakillari uchun sevimli, tom maʼnoda umumxalq bayramiga aylangan. Mana shu quvonchli lahzalarda butun xalqimizga murojaat qilib aytmoqchiman: bizning kuchimiz – birlik va ahillikda, qudratimiz – Vatanga mehr va sadoqatda, yutugʻimiz – oʻzimizga boʻlgan yuksak ishonchimizda!” – deya taʼkidlaganlar.
Joriy yilda ham Navroʻz umumxalq bayramiga bagʻishlangan tadbirlar milliy anʼana va qadriyatlarimizga muvofiq tarzda “Navroʻzni ulugʻlash – insonni ulugʻlashdir!” degan ezgu gʻoya asosida keng nishonlanmoqda.
Bularning barchasi inson qadrini ulugʻlashga, odamlarning hayotdan rozi va mamnun boʻlib yashashini taʼminlashga xizmat qilishi bilan yanada teran mazmun kasb etishiga ishonamiz.
Ushbu bayram arafasida har biringizga yurtimiz tinchligi va osoyishtaligi yoʻlida olib borayotgan fidokorona xizmatingiz uchun samimiy minnatdorlik bildiraman. Kelgusidagi gʻoyat masʼuliyatli va sharafli ishlaringizda ulkan yutuqlar hamda muvaffaqiyatlar tilayman.
Navroʻz har bir oila, har bir xonadonga quvonch, farovonlik va baraka olib kelsin!
Ichki ishlar vaziri general-leytenant A. Tashpulatov