Toshkent viloyatida huquqni muhofaza qiluvchi organlar rahbarlari ishtirokida xizmatoldi yoʻriqnoma oʻtkazildi
2026-03-19 12:50:00 / Yangiliklar
Videoselektor tarzida tashkil etilgan xizmatoldi yoʻriqnomasida markaziy studiyadan Toshkent viloyati hokimi, DXX, Prokuratura, viloyat IIBB, FVBB, Milliy gvardiya, soliq boshqarmasi rahbarlari hamda boshqa tegishli idora va tashkilotlar vakillari ishtirok etdi. Shuningdek, shahar va tuman studiyalaridan mazkur tashkilotlarning masʼullari qatnashdi.
Unda viloyat hududida joriy yildagi Ramazon hayiti, shuningdek, “Navroʻz” umumxalq bayramini munosib va yuksak saviyada oʻtkazish, bayram tadbirlari davomida fuqarolar tinchligi, jamoat tartibi hamda yoʻl harakati xavfsizligini taʼminlash va boshqa ustuvor vazifalar atroflicha muhokama qilindi.
Yigʻilish davomida bayram kunlarida aholi gavjum boʻladigan hududlarda xavfsizlik choralarini kuchaytirish, jamoat joylarida osoyishtalikni saqlash, huquqbuzarlik va koʻngilsiz holatlarning oldini olish, shuningdek, masʼul xizmatlar oʻrtasida oʻzaro hamkorlikni yanada mustahkamlash masalalariga alohida eʼtibor qaratildi.
Yigʻilish yakunida viloyat huquqni muhofaza qiluvchi organlar rahbarlari tomonidan Ramazon hayiti va “Navroʻz” bayramlari kunlarida fuqarolar tinchligi va osoyishtaligini taʼminlash, jamoat tartibini mustahkamlash boʻyicha masʼullarga aniq topshiriq va vazifalar yuklatildi.
Toshkent viloyati IIBB Axborot xizmati