IIV rahbariyati tomonidan Navroʻz umumxalq bayrami hamda Ramazon Hayiti bayramlari arafasida Toshkent–Janubiy vokzali hududlarida jamoat xavfsizligini taʼminlash, sayyohlar hamda yoʻlovchilar uchun yaratilgan sharoitlar holati koʻzdan kechirildi
2026-03-18 10:25:00 / Yangiliklar
Ichki ishlar vaziri oʻrinbosari general-mayor Mirzaraximov Baxodir Yuldashevich tomonidan Navroʻz umumxalq bayrami hamda Ramazon Hayiti bayramlari arafasida poytaxtda jamoat xavfsizligini taʼminlashga qaratilgan ishlar izchil davom ettirilmoqda. Xususan, Toshkent–Janubiy vokzali hududida amalga oshirilayotgan chora-tadbirlar atroflicha koʻzdan kechirildi.
Tekshiruv jarayonida bayram kunlari munosabati bilan yoʻlovchilar oqimi sezilarli darajada ortishi inobatga olinib, xavfsizlikni taʼminlash, tartib-intizomni mustahkamlash hamda fuqarolarga qulaylik yaratish masalalariga alohida eʼtibor qaratildi. Vokzal hududida jamoat tartibini saqlashga jalb etilgan ichki ishlar organlari xodimlarining xizmat olib borish tartibi, ularning texnik jihozlanganligi va tezkorlik darajasi ham atroflicha oʻrganildi.
Shuningdek, sayyohlar va mahalliy yoʻlovchilar uchun yaratilgan shart-sharoitlar, jumladan kutish zallari, axborot xizmatlari, yoʻl koʻrsatkich belgilar va sanitariya holati ham koʻzdan kechirildi. Aniqlangan kamchiliklarni bartaraf etish yuzasidan mutasaddilarga tegishli koʻrsatmalar berildi.
Ichki ishlar vaziri oʻrinbosari general-mayor Mirzaraximov Baxodir Yuldashevich tomonidan taʼkidlanganidek, bayram kunlarida fuqarolarning xavfsizligini taʼminlash, ularga yuqori darajada xizmat koʻrsatish ustuvor vazifalardan biri hisoblanadi. Bu borada barcha masʼul xizmatlar oʻzaro hamkorlikda ish olib borishi, har qanday holatga tezkor va samarali munosabat bildirishi lozim.
IIV Transport va turizm obyektlarida xavfsizlikni taʼminlash departamenti Axborot guruhi