Ichki ishlar vazirligida Navroʻz umumxalq bayramini nishonlashda jamoat xavfsizligini taʼminlashga jalb etilgan shaxsiy tarkib ishtirokida saf koʻrigi tashkil etildi
2026-03-17 15:00:00 / Yangiliklar
Ichki ishlar vazirining farmoyishi bilan “Navroʻz umumxalq bayramiga tayyorgarlik koʻrish va uni oʻtkazish mobaynida jamoat tartibini saqlash va xavfsizlikni taʼminlash boʻyicha respublika ichki ishlar organlari tomonidan amalga oshirilishi lozim boʻlgan tashkiliy va amaliy tadbirlar rejasi” asosida bugun vazirlik markaziy apparatida saf koʻrigi tashkil etildi.
Mazkur tadbir milliy anʼana va qadriyatlarimizni asrab-avaylash, xodimlarda vatanparvarlik, sadoqat va fidoyilik tuygʻularini yanada mustahkamlash, shuningdek, ichki ishlar organlarida xizmat intizomini yuksaltirishga qaratilgani bilan ahamiyatlidir.
Saf koʻrigi jarayonida markaziy apparat shaxsiy tarkibining maxsus kiyim-boshda yurish tartibi, tashqi koʻrinishi, maxsus vositalari tekshirildi.
Har bir xodimning saf nizomida belgilangan talablar darajasida xizmatga kirishishi, amaldagi buyruqlarni aniq va oʻz vaqtida bajarish koʻnikmalari, jamoaviy uygʻunlikdagi harakatlari alohida eʼtibor markazida boʻldi.
Oʻtkazilgan amaliy mashgʻulotlar orqali shaxsiy tarkibning jangovar va xizmatga tayyorgarlik darajasini oshirish, favqulodda vaziyatlarda tezkor va muvofiqlashtirilgan harakat qilish qobiliyatini rivojlantirish koʻzda tutilgan.
Tadbir davomida masʼul rahbarlar tomonidan shaxsiy tarkibga tartib-intizomiga qatʼiy rioya etish, oʻz xizmat vazifalarini sidqidildan bajarish, Vatanga sadoqat bilan xizmat qilish hamda yuksak masʼuliyat bilan harakat qilish yuzasidan tegishli koʻrsatmalar berildi.
Saf koʻrigi yakunida aniqlangan ayrim kamchiliklarni bartaraf etish, saf tayyorgarligi va xizmat intizomini yanada mustahkamlash, shuningdek, bayram tadbirlarini yuqori saviyada tashkil etish yuzasidan aniq vazifalar belgilab olindi.
IIV Axborot xizmati