IIV Akademiyasi rahbariyati Toshkent shahri Mirzo Ulugʻbek tumanidagi “Beshkapa” mahallasining kriminogen vaziyatini oʻrgandi
2026-03-17 09:00:00 / Yangiliklar
Dastlab masʼullar, “mahalla yettiligi” vakillari va faollar ishtirokida choraklik “yoʻl xarita”da belgilangan chora-tadbirlar ijrosi muhokama qilindi.
Taʼkidlash joizki, davlatimiz rahbarining mahallalarda xavfsiz muhit yaratishga qaratilgan tegishli qarorlari bilan mahallaga tajribali professor-oʻqituvchilar biriktirilgan.
Ishchi guruh tomonidan keyingi uch davomida sodir qilingan 28 ta jinoyatning asl omillari ilmiy yondashuvlar asosida oʻrganildi. Kriminogen vaziyatga salbiy taʼsir koʻrsatayotgan “jinoyat oʻchoqlari” aniqlanib, ularni bartaraf etishga qaratilgan taklif va tavsiyalar ishlab chiqildi.
Shunga koʻra, hududlarga 13 ta zamonaviy kamera, 11 ta tashvish tugmasi oʻrnatilib, xavfsizlik choralari kuchaytirildi. 350 dan ziyod turar joy, tashkilot va muassasalar texnik qoʻriqlovga olindi. Ijtimoiy profilaktika doirasida 89 nafar shaxs aniqlanib, “mahalla yettiligi”ga biriktirildi.
Kriminogen xavfi yuqori joylarda jamoat xavfsizligini taʼminlash va huquqbuzarliklarning barvaqt oldini olish maqsadida patrullik guruhlari tashkil qilinib, aholi oʻrtasida profilaktik tadbirlar oʻtkazildi.
Muhokama jarayonida mahalladagi muammolar, oila-turmush doirasidagi jinoyatlar, ijtimoiy profilaktika obyektlari bilan olib borilayotgan manzilli chora-tadbirlar yuzasidan fikr almashildi.
Akademiya boshligʻi aholi, ayniqsa yoshlar oʻrtasida huquqiy targʻibot tadbirlarini muntazam oʻtkazib borish, hududlarni kameralashtirish, profilaktika inspektori va fuqarolar oʻrtasida hamkorlikni kuchaytirish, murojaatlarga tizimli yondashish zarurligini qayd etdi.
Bundan tashqari, mahalladagi kriminogen omillardan kelib chiqib keyingi muddat uchun moʻljallangan manzilli chora-tadbirlarni ishlab chiqish, jinoyatchilikni jilovlash boʻyicha hudud tajribasini yaratish, mahallani “qizil” toifadan chiqarish borasida aniq vazifalar belgilab olindi.
IIV Akademiyasi Axborot xizmati