O‘zbеkiston Rеspublikаsi Ichki ishlаr vаzirligi

Kuni kecha Oʻzbekiston Respublikasi IIV Ixtisoslashtirilgan maktab-internatida Oʻzbekiston va Belarus Respublikasi Ichki ishlar vazirliklariga qarashli ixtisoslashtirilgan taʼlim muassasalari oʻquvchilari hamda rahbariyati ishtirokida “Kelajak huquq-tartibot posbonlari: avlodlar muloqoti va tajriba almashinuvi” mavzusida xalqaro videokonferensiya boʻlib oʻtdi.

Mazkur tadbir Oʻzbekiston Respublikasi IIV Ixtisoslashtirilgan maktab-internati hamda Belarus Respublikasi IIV Ixtisoslashtirilgan litseyi oʻrtasida tajriba almashish, doʻstona aloqalarni mustahkamlash va yoshlarni vatanparvarlik ruhida tarbiyalash maqsadida Toshkent–Minsk yoʻnalishida Zoom platformasi orqali tashkil etildi.

Tadbirning rasmiy qismida muassasa rahbarlari – podpolkovnik A.Begboyev hamda Belarus IIV Ixtisoslashtirilgan litseyi boshligʻi militsiya polkovnigi Y.Abramovich ishtirokchilarga tabrik soʻzi bilan murojaat qilib, huquq-tartibot organlari uchun zamonaviy kadrlar tayyorlashda xalqaro hamkorlik muhim ahamiyat kasb etishini taʼkidladilar.

Shuningdek, “Mening yurtim — mening faxrim” taqdimotida oʻquvchilar oʻz davlatlarining madaniy merosi va milliy qadriyatlari haqida maʼruzalar taqdim etdilar. Oʻzbekiston tomonidan 8-“D” sinf oʻquvchisi E.Latipov Vatan haqida maʼruza bilan chiqish qildi. “Bizning maktab-internat” qismida esa 9-“D” sinf oʻquvchisi B.Yoqubov taʼlim muassasasidagi oʻquv jarayoni va yaratilgan shart-sharoitlar haqida maʼlumot berdi.

“Tengdoshlar muloqoti” interaktiv sessiyasida oʻquvchilar savol-javob shaklida oʻzaro muloqot qilib, oʻqish jarayoni, sport yutuqlari hamda kelajakdagi kasbiy rejalari haqida fikr almashdilar.

Uchrashuv yakunida tomonlar oʻquvchilarning tayyorgarlik darajasi yuqori ekanini qayd etib, bunday xalqaro muloqotlar yoshlarning dunyoqarashini kengaytirish va kelajakdagi huquq-tartibot xodimlarini tarbiyalashda muhim ahamiyat kasb etishini taʼkidlashdi.

IIV Ixtisoslashtirilgan maktab-internati